بعد إيقافه بسبب أغنية مسيئة.. حمو بيكا: مش بتاعتي ولو أعرف إنها هتدخلني في مشاكل مكنتش غنتها

أكد مغني المهرجانات حمو بيكا، أنه لم يقصد الإساءة للجيش ومؤسسات الدولة، في الأغنية التي غناها في الفيديو الذي انتشر له على مواقع التواصل الاجتماعي، وهو يغني في أحد الأماكن المخصصة للسهر، وتسبب في إصدار نقابة المهن الموسيقية قرارا بإيقافه واستدعائه للتحقيق.
وقال حمو بيكا، في بث مباشر عبر صفحته الرسمية على موقع «فيسبوك»: «جيشنا جيش عظيم.. ورئيسنا رئيس عظيم، وأنا بحب بلدي ورئيسها، ولما بسافر وأشيل علم مصر، بكون فخور وأنا رافع علمنا وجيشنا.. أنا خدمت في الجيش 3 سنين، ومستحيل أهين الجيش أو أغلط فيه».
وتابع: «أنا لو أعرف إن الأغنية دي تسيئ لمصر أو لأي حد أنا عمري ما أقولها.. الأغنية دي مش أغنيتي بتاعت مطرب قديم معرفش هو مين، وكل المطربين الشعبي في مصر بيغنوها، وأنا غنيتها عادي ولو أعرف إنها هدخلني في مشاكل مكنتش غنتها».
وأضاف بيكا: «لما جيت غنتها الدنيا اتقلبت عليا.. أنا عمري ما أقدر أغلط في بلدي، ولو أعرف وغلاوة بنتي تاني عمري ما كنت هغنيها مش بقول كده عشان أرجع شغلي، رجعت مرجعتش طالع بقول إن عمري ما أغلط في بلدي، عملتوا حاجات كبيرة أنا مش قدها، آه مش بعرف لا أقرأ ولا أكتب بس بسمع اللي بيتقال، ليه تكبروا المواضيع معايا أنا بالذات، أنا مش حمل أي حاجة ولو أي حاجة هتبعدني عن بيتي وبنتي مش عايزها نهائي خالص، وياريت اللي بيكتب بلاش توصل الكتابة في حتة مش بتاعتنا، نخدم بلدنا برقبتنا».
كان حمو بيكا علق على قرار نقابة المهن الموسيقية بإيقافه واستدعائه للتحقيق، بنشر فيديو للمطرب الشعبي رضا البحراوي عبر حسابه الرسمي على موقع «إنستجرام»، وكتب: «صدر قرار وقف ليا من نقابة المهن الموسيقية وتحويلي للتحقيق، طبعاً أي قرار يصدر عن نقابة المهن الموسيقية بخصوصي أنا محترم القرار جداً وملتزم بيه».
وتابع: «بس أنا بطلب من سيادة النقيب المحترم أستاذي النجم الكبير مصطفى كامل، زي ما النقابة قامت بإصدار قرار بوقفي والتحقيق معايا، تصدر نفس القرار على كل مغني بيغني نفس الأغنية دي ويتم التحقيق معهم كلهم زيي بالظبط».
وأضاف: «الأغنية أنا بغنيها عادي ومش قاصد بيها اللي وصل للناس، المقصود بكلام الأغنية أن الأم بتخاف على ابنها، وده موال قديم جداً ومش مقصود منه الاستهانة بحد».
واستكمل بيكا: «وأنا ابن بلد وكنت واحد من جيش البلد وخدمت في جيش بلدي، وزي ما اخواتي الصحفيين شيروا البوستات يشيروا البوست ده وأنا رافع لهم مطربين تانيين وهما بيغنوها برضه، أنا بحترم نقابة المهن الموسيقية وبحترم كل قراراتها وبحترم كل مؤسسات الدولة وكل عام وقائدنا الرئيس عبدالفتاح السيسي وجيشنا العظيم بخير بمناسبة عيد تحرير سيناء».
يذكر أن نقابة المهن الموسيقية أصدرت قرارا بإيقاف تصريح عمل مؤدي المهرجانات الشعبية حمو بيكا، واستدعائه للتحقيق، بعد تداول مقطع فيديو له على مواقع التواصل الاجتماعي يحمل إساءة لمؤسسات الدولة.