المتهم بقتل شاب البراجيل: كان بيخرج مع خطيبتي ولما واجهته شتمني.. وخطيبته: حرامي وبيضربي

كشفت التحقيقات التي باشرتها النيابة العامة في القضية رقم 8584 لسنة 2024 جنايات أوسيم الخاصة بمقتل شاب صاحب مغسلة سيارات على يد عاطل في الجيزة كان يعمل لديه بالأجرة، تفاصيل الساعات الآخيرة قبل وقوع الجريمة والتي أقرها المتهم خلال تحقيقات النيابة العامة، كما شهدت خطيبة المتهم السابقة أنه كان سيىء السلوك ودائم التعدي عليه بالضرب ويتحصل منها على مبالغ مالية.
اعترفاته المتهم
وقال المتهم خلال اعترفاته أمام جهات التحقيق: كنت خاطب واحده اسمها "ر.ر" والعلاقة ما بينا كانت كويسه جدا لغايت ما لقيت تصرفاتها معايا اتغيرت وطريقتها ما بقتش حلوة خالص وتكدب عليا في حاجات كتير، وساعات أقولها أروح معاكي في أي مكان ترفض مش زي الأول معايا.
وأضاف المتهم" ابتديت الشغل مع سيد المجني عليه في المغسلة قعدت معاه في فرح واحد صاحبنا من البلد من فتره كبيرة و قالي تشتغل معايا في المغسلة، قولتله تمام أنا هشتغل معاك، ابتديت الشغل وأنا كنت خاطب، وكنت بحكيله كل حاجه على أنا وخطيبتي لما يكون ما بينا مشكلة".
وتابع المتهم أثناء اعترفاته في التحقيق، " لقيت "سيد " صاحب المغسلة بيقولي رحاب خطيبتك رافعه بوست علي الفيس بوك بتقول فيه ( تم بحمد لله فشكلة خطوبتي) أنا أستغربت جدا من طريقته معايا وقتها، وبعد كده القيته واحنا الصبح كنا فاتحين المغسلة لقيته بيقولي أنا رايح مع "ر.ر" مشوار علشان هيا اتصلت عليه أنا أستغربت وقتها من اللي بيقولهولي وبعدين أيه علاقته برحاب بالظبط".
وواصل" لما رجع على أذان العصر في نفس اليوم، فقولتله عملت أيه مع رحاب بالظبط قالي أنا كنت معاها في كذا مشوار وبعد كده خلصنا المشواير وروحتها البيت وأنا سكت ما ردتيش أرد عليه لغايت ما اليوم خلص وقفلنا المغسلة مع بعض بليل متأخر فقولتله: عاوز اكلم في موضوع، قالي: نوصل محمد الأول الولد الصغير اللى شغال معانا.. وبعدين تتكلم في اللي أنت عايزة".
اللحظات الأخيرة
وأردف" وأحنا راجعين قولتله أنت إزاي بتكلم " ر. ر" اللي في الأصل خطيبتي مش المفروض تستني لغايت ما أنهي الموضوع ده وبعدين تتكلم معاها رد عليا بالظبط قالي بقولك إيه اللي بينكم وبين بعضيكم أنا مليش دخل فيه واللي أعمله ميخصكش يا حسام رديت.. عليه وقولتله إزاي يعني مش في بينا عيش وملح، لقيته بيرد عليا ويقولي الملح داب والعيش كلته الكلاب فقولتله ده إزاي ده ياريس".
وتابع المتهم" قام سبلي الدين وشتمني بأبويا وأمي رديت عليه الشتيمة عالطول وسبتله الدين، قام هو واقف بالمكنه بتاعتي ونزل منها نزلت وراه قومت قايله أنا أتخنقت منك ومسك فيا من فوق هدومي وأنا مسكت فيه من فوق هدومه وفضلنا
ماسكين في بعض، فوقع علي الحجر بوشه وأنا وقعت من فوق منه بس قمت عدلته على ضهره لقيت وشه كله جاب دم وبالذات من مناخيره والحجر اللي وقع عليه لقيته برضوا فيه دم و قعدت أزق في الحجر الكبير اللي كان موجود على الأرض اللي سيد وقع عليه بوشه الغايت ما الحجر بقا فوق صدر سيد".
وذكر" وبعد كده حطيت ايدي في جيوبه وأخدت التليفون بتاعه والفلوس وبطاقته و رخصته بباعت مکنه كده كانت في جيبه، وبعد کده رکبت المكنه بتاعتي ومشيت لحد ما جابوني على النيابة".
تحقيقات خطيبة المتهم السابقة
وقالت "رحاب .ر" إنها كانت خطيبة المتهم لكن لم تستمر الخطبة وتم فسخها مشاكل بينها وبين المتهم" وبعد كده أهلي قالوا لأهل حسام صابر كل شي قسمة ونصيب وأنا نزلت على الفيس بوست بكده أن الخطوبة الفشكلت".
وأضافت أن المتهم كان يعمل مع المجني عليه في المغسلة باعته، ولما يكون ما بيني وبين حسام أي مشاكل وهو متخانق معايا وضاربي، سيد كان بيدخل علشان يحل المشاكل، وكان بيساعد حسام كثير في سداد ديونه ويحل ليه مشاكله مع الناس.
وتابعت الفتاة خلال التحقيقات" لغايت ما حاول سيد يدخل ما بينا قبل الخطوبة ما تنتهي بس مكنش يفع فيها أي حلول لأن خلاص كان قفلني منه وأهلي رافضين أي حل وأنا بلغت سيد علشان يبلغ حسام بكده لغايت ما عرفت من أهالي البلد أن حسام قتل سيد بعد ما خلصوا شغل مع بعض في المغسلة.
وعن طبيعة الخلافات التي كانت بينها وبين المتهم، ذكرت أن المتهم كان يقوم بضربها " حسام بيمد إيده عليا كبير ويضربني وكنت بستلف ليه فلوس وأساعده في زنقته كثير .
وأوضحت أن المتهم كان يتقضى من عمله مع الجني عليه في المغسلة 100 جيها في اليوم، وبعد قال لسيد أنا عايز 150 جنيه، لافتة إلى أن المجني عليه كان يصطحبها هى والمتهم خطيبها السابق خارج البلدة للتنزه
" كنا بنخرج مع بعض نأكل ونشرب وكنت مع حسام كان سيد ياخدنا ويأكلنا بره البيت وبعد ما ينقضي اليوم لأن كلنا جيران في قرية واحد.
وحول سرقة المتهم للمجني عليه أردفت الفتاة، حسام أصلا حرامي وناس كثير اشتكوه في السرقة وعليه ديون كثير وحذروني منه وهو طلب مني قبل فلوس كثير علشان يسدد الديون بتاعته وسرق من واحد قبل كده برضوا تليفونه علشان يبيعوا وسيد اللي حل المشكله ورجع للراجل التليفون بتاعه.
تحديد جلسة
وقال أحمد السقيلي دفاع المجني عليه، إن المحكمة حددت يوم 18 أغسطس لنظر القضية المتهم بها عاطل قام بقتل صاحب المغسلة التي يعمل بها مع سبق الإصرار والترصد.
ووجهت النيابة العامة للمتهم "حسام.ص" أنه قتل المجني عليه " سيد .ب"عمدا مع سبق الاصرار وذلك إثر خلاف بينهما عقد العزم وبيت النية على الخلاص منه، وما أن ظفر به قام بضربه وخنقه وحبس أنفاسه بقطعة قماشية أحكمها حول عنقه، ورطم رأسه بقوة في حجر حتى خرت قواه.
اتهامات النيابة العامة
وأسندت النيابة العامة للمتهم أنه حتى يتيقن من وفاته، وضع ذلك الحجر على صدره، قاصدا قتله، محدث اصاباته المبينة تقرير الصفة التشريحية والتي أودت بحياته على النحو المبين بالتحقيقات.
وتضمنت الاتهامات الموجه للمتهم في أوراق القضية أنه سرق المنقولات والمبلغ المالي مملوكين للمجني عليه، و اتلف عمدا الهاتف المحمول المملوك للمجني عليه بأن هشمه بقدمه.