الليثي وصيام يتحدثا عن كوكب الشرق أم كلثوم في برنامج الحلواني

تتناول حلقة الخميس المقبل، ختام شهر رمضان من برنامج "الحلواني" للإعلامي د. عمرو الليثي، والفنان أحمد صيام، الحديث عن حلواني جديد من الذين بنوا مجد وعظمة مصر في جميع المجالات، وتكون الحلقة عن كوكب الشرق أم كلثوم.
وقال عمرو الليثي، إن هناك مناسبات مرتبطة في حياتنا وفي ذكرياتنا بأشخاص بعينها، فمثلا شهر رمضان نعرف أنه وصل لما نسمع صوت عبدالمطلب أو عبدالغني السيد، وفي نهاية رمضان نعرف أنه خلاص قرب يودعنا لما نسمع شريفة فاضل وهي تقول: "والله لسه بدري يا شهر الصيام"، و"ليلة العيد" لأم كلثوم.
ويعقب أحمد صيام: "أم كلثوم دي ستنا التي أمتعتنا ورفعت رأسنا، والوحيدة اللي لما تقول الست، تبقى الست فاطمة بنت الشيخ إبراهيم البلتاجي".
ويرد عمرو، بأن فاطمة اسمها الأصلي لما كانت في السنبلاوين، ثم اكتشفها الشيخ أبو العلا محمد، وتبناها زكريا أحمد ليصبح اسمها "الأنسة أم كلثوم".
وتابع أحمد صيام: "قول كوكب الشرق يا باشا .. سيدة الغناء العربي .. شمس الأصيل .. صاحبة العصمة .. فنانة الشعب، ما هي كلها ألقاب خدتها الست طوال مشوارها، بس أنا بقى بحب قوي اسميها الحلوانية، أحلى منتجات المحروسة، مصر كلها بتعتبر الست أم كلثوم واحدة من كل عيلة، بنت كل أسرة من بحري إلى الصعيد الجواني، يا أخي دا الواحد مننا لما بيسافر بره بيقول أنا من بلد أم كلثوم".
وأضاف عمرو: "بلد أم كلثوم وبلد عبد الوهاب وعبد الحليم وطه حسين وطلعت حرب ومجدي يعقوب، ما هما دول على رأيك اللي بنوا مصر، وكانوا في الأصل الحلوانية اللي حلوا حياتنا، ونشروا إبداعاتهم وفكرهم في المنطقة كلها".
ليرد صيام: "بس الست أم كلثوم بالذات حكاية تانية خالص يا عمورة، كانت فلتة زمانها ومعجزة من يومها، وعمرها 12 سنة قدرت تبهر السميعة الكبار في المحروسة، ولما جابها الشيخ زكريا من طماي الزهايرة عشان تحيي حفلة الإسراء والمعراج في قصر عز الدين باشا يكن، أبهرته وأبهرت زوجته اللي من شدة إعجابها بغناها قلعت الخاتم من أيدها واهدتهولها".
وليعقب عمرو: "ومن يومها وأم كلثوم بقت نجمة حفلات علية القوم في المحروسة كلها"
وقال صيام: "مش بس المحروسة، دي بقت نجمة الغناء في العالم العربي، ووصفتها الصحافة الأجنبية بأنها السيدة اللي قدرت لوحدها توحد العرب بغناها من المحيط إلى الخليج".
ويتابع عمرو الليثي: "مش هقدر أنسى يوم رحيلها، كان أكتر يوم حزين في التاريخ، كانت جنازة ماشفهاش العالم قبل كده 4 ملايين إنسان كانوا ماشيين في جنازتها بيودعوها".
وأضاف رمضان: "الغريب أنها رغم مرضها وآلام الكلى اللي كانت بتعاني منها، إلا أنها كانت بتغني لغاية آخر لحظة في حياتها، وقبل الست ما تسافر في رحلة علاجها الأخيرة كانت بتجهز أغنية أوقاتي بتحلو اللي لحنها سيد مكاوي، بس للأسف أتوفت قبل ما تغنيها وغناها بعد كدا الشيخ سيد بنفسه بعد رحيلها".
وأكمل عمرو: "عرفت كمان يا رمضان أنها قبل رحلة العلاج سنة 75 كانت طلبت من الشاعر صالح جودت، يكتب لها أغنية وطنية يلحنها رياض السنباطي، عشان تغنيها بعد ما ترجع في احتفالات نصر أكتوبر، ولكن رحمة الله عليها القدر ما أمهلهاش".
ليعقب صيام: "بس الحقيقة أنا سعيد من المسلسل الكبير اللي أنتجه قطاع الإنتاج عن حياتها، وصابرين كانت هايلة في تجسيد شخصيتها، ويا ريت نشوف مسلسلات وأعمال فنية أكتر عن مشوارها وحياتها، دي كانت أسطورة وما اتكررتش والله".
ويذاع برنامج "الحلوني"، عبر إذاعة الشرق الأوسط في الساعة 5.25 قبل الإفطار، والإعادة 9.10 صباحا من الأحد إلى الخميس يوميا خلال شهر رمضان.
والبرنامج من تقديم الإعلامي د. عمرو الليثي، ويشارك في التمثيل به الفنان القدير أحمد صيام، ويكتبه الكاتب الصحفي محمد الشبّه.