ارتداء طالبات إسدال أسود داخل مدرسة.. عمرو أديب مستنكرا: عقل البنت دي هيبقى عامل إزاي!

علق الإعلامي عمرو أديب، على ارتداء طالبات مدرسة نشا الإعدادية بنات بالدقهلية «إسدال» كزي مدرسي، مؤكدًا في بداية حديثه أن كلامه لا علاقة له بالحجاب.
وأضاف خلال تقديمه لبرنامج «الحكاية»، المذاع عبر فضائية «MBCمصر»، مساء الاثنين: «لست في إطار الحديث أن الحجاب فرض أو غير فرض، كل واحد حر في علاقته بربه، وكل شخص سيحاسب بما فعله».
وقال إن الملابس التي ظهرت به الفتيات غير موجود في الثقافة المصرية، مضيفًا: «مش هو ده شكل الحجاب والتحشم المصري، ينفع ده يبقى شكل مدرسة في مصر؟؟ إحنا بنلبس كده؟! دول بيتعلموا إيه وهتطلعهم إيه؟».
وتابع مستنكرًا: «عشان أكون واضح وضوح الشمس اللي تحجب يتحجب واللي يلبس يلبس واللي يقلع يقلع، ده شكلنا إحنا! إحنا عاملين كده؟ إزاي وزارة التربية والتعليم تسيب ده، دول بيفكروا إزاي؟ وهيربوا عيالهم على إيه؟ ألا أجد فيكم شخصًا رشيدًا؟ عقل البنت دي هيبقى عامل إزاي».
واستطرد: «لا أعترض إن البنات في المدرسة تلبس محترم ومتحشمة، لكن ده لبس مين؟ أوعى تقول لي ده لبسنا، أنت بتمهد لإيه؟؟ السواد ده بتاع مين؟ بتعملوا إيه في عقل العيال، أومال في الفصل بتعملوا إيه، بتتكلموا إزاي وبتعلمها إيه.. من أنتم؟».
وكانت مواقع التواصل تداولت صورا لطالبات مدرسة نشا الإعدادية بنات في محافظة الدقهلية وهن يرتدين «الإسدال الأسود» كزي مدرسي.