عبد الرحيم كمال: بحب هاني شاكر وضد قرار إيقاف مطربي المهرجانات

حرص الكاتب عبد الرحيم كمال، على أن يدلوا بدلوه في الأزمة التي تشهدها الساحة الفنية حاليًا بسبب قرار نقابة الموسيقيين بشأن إيقاف 19 مطربًا من المنتمين لما يسمي ب"مطربي المهرجانات"، والهجوم الذي تعرض له النقيب هاني شاكر إثر هذا القرار.
وكتب "عبد الرحيم" عبر حسابه الرسمي على موقع التواصل الاجتماعي فيسبوك: "على فكرة أنا بحب صوت هاني شاكر، وضد التطاول على صوته، وفي نفس الوقت أنا ضد قرار نقابة الموسيقيين تمامًا، وأنا بحب أم كلثوم وعبدالوهاب وعبدالحليم وفيروز، واللي قبلهم كمان من سيد درويش لصالح عبدالحي، وسميع قديم وضد محاربة الموسيقى الجديدة ويحبها وبحب عمرو دياب، وعلي الحجار، ومدحت صالح، ومحمد منير، وويجز، ومسلم ومروان بابلو، وبيكا وشاكوش، والأغاني الجديدة حتى لو كان فيها مشاكل من وجهة نظر البعض، هي مش حرب بين فريقين خالص، هي حرب بين فكرتين، فكرة إن الوصاية متكونش من جهة محتكرة الوصاية".
وأضاف كمال: "والاختيار بيكون لصاحب الرأي الوحيد في القضية دي، وهو الجمهور ثم الجمهور ثم الجمهور، والجمهور كده كده مع الوقت هيختار الجديد ويكمل معاه، وهيكون جديد تم محاربته وتشويهه وتهذيبه والرضوخ ليه في النهاية، لحد ما يبقى فن مقبول ومعاصر، وبيجي فن جديد وتتكرر الحكاية، هي مش حرب أذواق ولا أصوات هي حرب أفكار بتتراجع وأخرى بتتقدم، وعند لحظة التسليم والتسلم يحدث الصدام الحتمي، وفي النهاية اللي جاي واللي بيعبر عن الحاضر وبكرة هو اللي بيكسب، لأن الفن حراك وصراع وصدام وتطور، هي دي القصة".