محمود سعد يتحدث عن توقف برنامجه «باب الخلق» ويكشف عن خطوته المقبلة

كشف الإعلامي محمود سعد، عن خطته للفترة القادمة بعد توقف برنامجه «باب الخلق»، وذلك في فيديو نشره عبر قناته الخاصة على موقع «يوتيوب»، مشيرا إلى أن توقفه لم يكن بسبب القناة الناقلة له أو أسباب خاصة منه، طالبا من جمهوره ألا يحزن لتوقف البرنامج، ووعدهم بأنه سيضع مجهوداته في لقاءهم عبر اليوتيوب.
وقال محمود سعد في الفيديو: "باب الخلق خلاص ملوش نصيب يستمر أكثر من كده، وليس السبب مشكلة من القناة أو مشكلة من عندي ولكن كل حاجة بتبدأ وبتخلص، والحمد لله ربنا فتحلنا سكة تانية نتقابل منها، ممكن كل راجل طيب أو ست طيبة أو شاب أو طفل بيشوفني، ممكن يشوفني على اليوتويب، وأرجوكم لو حد والدته بتحب تشوفني على التلفزيون يفتحلها اليوتيوب تشوفني عليه، علشان مبحبش أزعلهم أبدا بس مش بإيدي".
وتابع: "دلوقتي هنمشي ونتجول في الشوارع ونصور ونتكلم ونحاول نقدم اللي نقدر عليه، مش لغرض إلا غير إني أفرجكم الناس اللي أنتم ممكن في زحام الحياة مبتشوفوهاش، واللي أنا شخصيا مبشوفهاش، وبشوفها معاكم من أول وجديد وبكتشف الناس من أول وجديد".
وأوضح: "أنا اكتشفت في نفسي حاجة وأنا عندي 47 سنة أول مرة أعرفها، وهي إني أعرف أظهر في التلفزيون اللي كنت بخاف منه جدا، وصدق أو لا تصدق إن بعد 20 سنة اكتشفت وأنا عندي 67 سنة إن أنا أقدر أكلم الناس وتسمعني والموضوع يكون لطيف ويعجبكم، فكأن الترتيب حصل إن ربنا بيفنحلنا مجال ثاني جديد، ماكنش في بالي خالص حتى وأنا عندي 66 سنة إني أعرف أعمل الموضوع ده".
وأضاف: "هنزل أركب عربيتي أو أجر عربية ميكروباص أو تاكسي، وننزل نصور مع الناس في كل محافظة من محافظات مصر، بلدنا مليانة بأماكن حلوة وإن شاء الله أفرجكم على أماكن حلوة وتعجبكم، وأرجوكم متزعلوش إن برنامج باب الخلق وقف".
وكشف سعد عن بداية ظهوره على اليوتيوب قائلا: "وزي ما بقول لكم ربنا فتحلي باب تاني، اتفتحت بقى أزاي، مصائب قوم عند قوم فوائده، ساعة أزمة كورونا أحنا شغالين وبنعتمد على التصوير الخارجي، صحيح بيكون في استضافات في الأستديو بس في المجمل بنصور خارجي، المهم أنا والفريق الذي أعمل معه جاءت لنا فكرة بأنني أحكي حكايات، وبدأت أول حكاية عند الفتاة التي كانت جميلة وأصبحت قبيحة، وإذا بحضراتكم تتبسطوا، وهم بقالهم 10 سنين بيقولولي أعمل قناة على اليوتيوب وأنا أرفض، ولكن أكتشفت في نفسي حاجة ماكنتش أعرفها".
وعبر محمود سعد عن سعادته برد فعل الجمهور بعد إعلان توقف البرنامج، من خلال تدوينة نشرها عبر حسابه الرسمي على موقع «تويتر»، قال فيها: «ماكنتش اعرف إن باب الخلق له هذه القيمة الا لما قرأت ردود الفعل بعد توقف البرنامج.. واذا كان فيه قيمة للبرنامج فهي قيمة الناس اللي في الشارع اللي شرفوني وفتحوا قلوبهم.. محبة كبيرة لهم ولكم».