الفنان شريف دسوقي: كنت مهدد ببتر رجلي.. وعيب يتقال عليا بدخل اللوكيشن سكران

كشف الفنان شريف دسوقي، حقيقة الأخبار المتداولة بشأن ما أشيع عن طرده من لوكيشن الأعمال التي تعاقد عليها مؤخرا، ودخوله إلى مصحة نفسية.
وكتب عبر صفحته على فيسبوك: "اللي حصل إني أُصبت في رجلي أثناء تصوير أحد المسلسلات اللي مشوني منها، ويشهد على كدا كل اللي بيتعاملوا معايا، اتصابت يومها بجرح صغير، ومكنتش أعرف إني عندي سكر، المهم روحت وجيت تاني يوم، حسيت بدوخة قولتلهم ودوني المستشفى أفاجئ إن ولا واحد من المسلسل معايا، باستثناء المنتج أحمد الجنايني وهو منتج فيلمي وقفة رجالة".
وتابع: "عملت تحاليل واكتشفت إني عندي سكر، وخبيت على الأستاذ أحمد الجنايني إني مصاب، عشان معطلش التصوير بتاع فيلم وقفة رجالة، الحمدلله نتاج تحملي ربنا كرمنا، خلصت الفيلم وداخل حاجات تانية".
وأردف: "فوجئت إن الدنيا كلها بتقول مشّوا شريف من المسلسلات عشان بيخش مخمور وسكران، أنا المتربي على مدرسة إسماعيل ياسين أنا مدرّب مادة التمثيل مستحيل أبقى نصاب، بطالب بحقي فقط لا غير إني أتعوض عن اللي حصل، أنا مخدتش تلت أجري ومش عيب أقول كدا".
واستغرب: "مصحة نفسية؟ .. هي زيارة نفسية اللي روحتها وكانت من 20 سنة لما انفصلت عن زوجتي أم ابني، هو فيه حد لما ينفصل عن زوجته ينزل الشارع يرقص؟ .. أنا 40 سنة ببني نفسي بدراعي واشتغلت مع أكبر مخرجين مصر اسألهم شريف عامل إيه في اللوكيشن".
وأكمل: "ليه الموهوب واللي بينوّر في زماننا بيحاربوه؟ .. ليه احنا البلد اللي بتقتل الموهوبين الحقيقيين؟ .. أنا زعلت عشان حالتي كانت صعبة من 8 أشهر استشاريين كانوا يعيطوا وميقدروش يبصوا لرجلي النهاردة الحمدلله ربنا عافاني بعد فترة مقولتش لحد فيها حاجة بس من حقي أزعل لما اتكشف إعلاميًا غصب عني أنا مكنش عندي صداع أنا كنت مهدد فعلًا ببتر رجلي!".
وختم كلامه: "عيب يتقال عليا إني روحت مصحة نفسية أو بدخل اللوكيشن سكران أنا بحضر قبل التصوير بساعتين وبقعد مع العمال نظبط الديكورات ونفطر مع بعض، الظلم وحش".
وكان ظهر الفنان شريف دسوقي في حلقة أمس الاثنين، على برنامج الحكاية، الذي يقدمه الإعلامي عمرو أديب وبكى بشدة بسبب إحساسه بالظلم الذي يتعرض له.

اللي حصل إني أُصبت في رجلي أثناء تصوير أحد المسلسلات اللي مشوني منها، ويشهد على كدا كل اللي بيتعاملوا معايا .. اتصابت...
Posted by Sheref Desoky - شريف دسوقي on Tuesday, March 23, 2021