رانيا فريد شوقي: عين فاروق الفيشاوي كانت بتدمع أثناء تحية الجمهور على المسرح

قالت الفنانة رانيا فريد شوقي، إن الفنان الراحل فاروق الفيشاوي أعلن في مهرجان الإسكندرية السينمائي عن مرضه بالسرطان، وأنه سيتعامل معه كأنه "صداع"، موضحة -خلال منشور كتبته عبر صفحتها على موقع "فيسبوك"- أن الراحل بالفعل تعامل هكذا مع المرض اللعين خلال الفترة الماضية.
وأضافت: "كنا بنعمل بروفات مسرحية (الملك لير)، عمره ما جه مكشر أو حزين، بالعكس دايما بيضحك ويهزر مع كل الناس من الصغير للكبير، وكان دايما يقولي يا بنت الملك، ويعد يحكي لي حكايات هو وبابا، ولأنه إنسان قوي هو عارف إن سيرة أبويا بتسعدني، فبيتعمد يحكي عشان يسعد قلبي، وهو كمان من حبه لبابا بيبقى سعيد إنه يتكلم عنه ويترحم عليه، وقالي تعالي أوريكي أنا عامل إيه في أوضتي في المسرح، لقيته معلق صورة أبويا وفنانين من الزمن الجميل".
وتابعت: "وابتدينا عرض المسرحية، والله العظيم عمره ما حسسنا إنه مريض أو تعبان، بالعكس كان دايما بيهزر ويضحك ويستمتع بالتمثيل، لدرجة إننا نسينا إنه مريض، وحتى لما اعتذر عن السفر مع المسرحية للسعودية ما قالش إنه تعبان، ولما رجعنا من السفر عرفنا إنه دخل المستشفى في حالة حرجة؛ كنا هنتجنن عايزين نطمن عليه، لكن للأسف ممنوع الزيارة وعرفنا الخبر المؤلم".
واختتمت: "كان نفسي أشوفه بس عارف يا روقا أنا اتعلمت منك القوة وحب الحياة وإن مع المرض مش لازم أكون ضعيف، وأفضل أعافر وأقف على رجلي لآخر لحظة استمتع بالحاجة اللي بحبها وهي التمثيل وأشوف حب الناس ليا.. تصفيقهم الحار ليك كل يوم أكيد ده كان بيسعدك، وأنا شفت ده في ضحكتك وعيونك اللي كانت بتدمع أثناء التحية.. ياه إيه جمالك ده، لا اشتكيت ولا كنت حتى بتتكلم عن مرضك كأنه مش موجود، وكنت راضي باللي ربنا كتبهولك، يا تعيش يا تموت، وأنت اختارت تعيش وتتبسط وتبسط اللي حواليك، لآخر لحظة ضحكتك مابتفرقنيش الله يرحمك ويجعل مثواك الجنة ويجعل صبرك ورضاك وجدعنتك والخير اللي كنت بتعمله وكل إنسان أنت أسعدته وجبرت بخاطره في ميزان حسناتك يارب.. هتوحشنا أوي".