صفحة للبلطجة على «فيس بوك» تحدد تسعيرة لاستعادة الحقوق بالقوة

«الداخلية»: جار تتبع مؤسسى الصفحة لقيامهم بالتحريض على العنف وإلغاء القانون
انتشرت على موقع التواصل الاجتماعى «فيس بوك»، صفحة تحمل اسم «السراج لأعمال البلطجة واستخلاص الحقوق»، تدعى استعادة حقوق المظلومين عن طريق استئجار بلطجية بمقابل مادى، وأعلنت عن تسعيرة مع وجود تخفيضات بمناسبة شهر رمضان.
وبررت الصفحة تأسيسها بأن القانون لا يحمى أحدا، وكتب الأدمن «عشان إحنا فى بلد مفهاش قانون يحميك أو يجبلك حقك.. لو عربيتك اتسرقت الشرطة ما بترجعهاش.. لو حد وقفك فى الشارع وخد فلوسك محدش هيحميك.. لو أى حد أطول أو أكبر أو عنده ناس أكتر منك يقدر ما يدكش حقك.. وياكل عليك فلوس أيا كان».
وتابع: «علشان ما تعرفش تركن عربيتك تحت البيت علشان عندك جار بيضرب برشام وواخد المكان عافية، علشان سواق الميكروباص يزود الأجرة عليك، ولو مش عجبك هتتشتم وتنزل».
وأضاف: «باختصار علشان إحنا بلد أكل الحقوق.. بلد القوى بياكل الضعيف.. إحنا قررنا إننا مش هنسب حق حد إلا لما نرجعه، وبمناسبة شهر رمضان عملنا تخفيضات شوية على الأسعار بتاعتنا، ودلوقتى لو فيه جار ليك بيبلطج عليك ومش عايزك تركن العربية بتاعتك أو بيبوظلك أى حاجة فى الشقة أو العمارة، تقدر تاخد حقك منه، ولو فيه حد خبطلك عربيتك وما رضاش يصلحهالك، سواق ميكروباص خبطك شتمك سرقك أى حاجه تقدر تبعتلنا وإحنا هناخدلك حقك فى وقت أقل من أسبوع».
من جانبه قال مصدر بوزارة الداخلية ل«الشروق»: إنه تم رصد الصفحة وجارٍ ضبط مؤسسيها، مشددا على أن الصفحة تدعو إلى تكريس أسلوب البلطجة والعنف، وتلغى استعادة الحقوق عن طريق القانون، وهو مبدأ لاتعرفه دولة المؤسسات مثل مصر.
وطالب المصدر أى مواطن بالإبلاغ فورا عن أية صفحات مشابهة تدعو إلى العنف والبلطجة وعدم احترام هيبة وسيادة القانون.