الدورى المصرى ما له وما عليه

* جبرت , خلاص متبسطهاش اكتر من كده هذا هو لسان حال جماهير نادى الزمالك هذا الموسم لكره القدم 2014-2015 وذلك بعد باقه الأرقام القياسيه التي حققها الفريق مش بس كده ده كمان كسروا ارقام احتفظ بيها النادى الاهلى لسنوات طويله , كل التهنئه لنادى الزمالك وجماهيره .
دلوقتى هنطير لأجواءالدورى المصرى نعرف ارقامه ونقرا كلامه وكلام الكوره السنادى كان كلام كبير الدورى المصرى وما له وما عليه هذا الموسم وحقيقه ضعفه وانه دورى خارج التصنيف العالمى وانه سلعه راكده ومن الاخر بايره ده مش كلامى ده كلام اتحاد الكره اللى بيحاول دايما يقنعنا بيه عشان تكون الستاره اللى تدارى فشلهم الكبيير في الاداره الدورى المصرى تسويقه صعب و كلام كتير من اتحاد الكره ,اتحاد علمنى العوم والنبى يابوريده.
اللى هيرد على كذب وافتراء هذا الكلام ارقام الدورى واحصائياته اللى هنسردها لحضرتكم في السطور القادمه.
الدورى هذا الموسم قوامه 20 فريق وعدد الفرق ده بيعتبر اكبر عدد فرق بالدورى منذ نشأته في عام 48 وطبعا اعطى فرصه اكبر لنادى الزمالك لتحقيق مزيد من الأرقام القياسيه , عدد المباريات هذا الموسم وصل الى 380 مباراه وطبعا كمان ده اكبر عدد مباريات يلعب في موسم واحد منذ 48 .
* ونبدأ الحكايه مع المتصدر كينج كونج هذا الموسم نادى الزمالك وارقامه اللى بتقول ان الفريق حقق 26 انتصار وبالتالي نجح الزمالك في انه يعادل رقم النادى االاهلى في تحقيق اكبر عدد انتصارات خلال موسم كروى وكان ده في موسم 74 يعنى باختصار الزمالك السنادى عادل رقم النادى الاهلى اللى فضل متفرد بيه طيله 41 سنه , الفريق حقق 87 نقطه له 69 هدف وده كمان رقم جديد لنادى الزمالك وعليه 21 هدف وبكده اصبح الفريق صاحب اقوى هجوم وكمان اقوى خط دفاع .
* الغريب بقى ان مش بس المتصدر نادى الزمالك هو صاحب الأرقام القياسيه هذا الموسم لكن كمان متصدر الدورى من تحت نادى العاب دمنهور صاحب المركز الأخير حقق كمان ارقام قياسيه شديده لما نعرف انه في خلال 38 مباراه هزم في 30 والكوره سلمت على شباكه 82 مره في رقم قياسى جديد كأكثر الفرق هزيمه واكثرهم استقبال للأهداف طوال تاريخ الدورى العام .
* الدورى هذا الموسم كان حلو كان ممتع والمنافسه رغم انها كانت محسومه من بدرى الا ان الأرقام بتعكس غزارة الأهداف اللى وصلت 907 هدف بمعدل اكثر من 2.4 في المباراه وكمان ظهور نجوم جدد على خريطه الكوره في مصر غير ارقام جديده غير اكبر عدد من الحكام الشباب في موسم واحد ومش هتكلم عن الأداء التحكيمى ,غير بقى استوديوهات ومحطات واعلانات وبدل وكرفتات ومشاكسات شوبير والغندور يا عينى يا قلبى ولفه جاتوه مدحت شلبى الله الله الله .
* – عدد مباريات الدورى وصل زى ما قولنا 380 مباراه سجل فيها 902 هدف عدد الانتصارات اى المباريات المنتهيه بفوز احد الفريقين وصل 245 مباراه يعنى قرابه 65 % من المباريات انتهت بالفوز ودى كانت اكبر نسبه في تاريخ الدورى , عدد الكروت الصفراء كان 1259 كارت , الكروت الحمراء 80 كارت .
* القيمه السعريه للدورى 600 لاعب داخل 20 فريق وصلت ل مليار و100 مليون جنيه , صفقات الموسم الماضى وصلت لقرابه 75 مليون جنيه نصيب الاهلى و الزمالك كان 44 مليون و18 نادى مجتمعين تقريبا 30 مليون .
* نادى الزمالك في بدايه الموسم كان الأكثر ابرام لصفقات وصلت 19 صفقه يعنى فريق بالاحتياطى بتاعه وبصراحه جابت نتيجه والدليل فزهم بالدورى .
* هداف الدورى اللاعب حسام سلامه باولو مهاجم فريق الداخليه برصيد 20 هدف واللى اتنقل لنادى سموحه في صفقه صامته .
* افضل صفقه ايمن حفنى نجم نادى الزمالك المنتقل في بدايه الموسم الماضى من نادى طلائع الجيش الى نادى الزمالك واللى كان له تأثير كبير هذا الموسم على الفريق وظهر جدا اهميه اللاعب لما غاب عن مباره الفريق امام النادى الاهلى وانتهت بخساره نادى الزمالك .
* يأتى في المركز الثانى كأفضل صفقه اللاعب مؤمن زكريا المنتقل من انبى الى النادى الاهلى عبر بوابه ميت عقبه وذلك بعد انتهاء اعارته للفريق الأبيض وفشل كل محاولات الزمالك في شراء عقد اللاعب نظرا للخلافات بين إدارة الناديين انبى والزمالك على مستحقات متبيقيه لنادى انبى من صفقه بيع اسلام عوض للزمالك وتصميم انبى على سداد القديم عشان يفكروا في الجديد , وهنا تدخلت الاداره الحمراء وخطفت اللاعب وكانت صفقه ممتازه جدا وتغير شكل الفريق مع بدايه الدور الثانى .
* افضل مدرب الكابتن إيهاب جلال اللى استطاع مع نادى مصر المقاصه بأمكانات محدوده وبدون أي بروباجندا انه يفوز بالمركز الرابع بالدورى ويتفوق على انديه عريقه زى الاسماعيلى والمقاولون العرب والاتحاد سيد البلد وقدر يجمع 64 نقطه ويفوز ب 18 مباراه وكمان خرج الفريق مجموعه من النجوم هضيف كتير للكره المصريه بأذن الله أمثال احمد الشيخ المنتقل للنادى الاهلى والمهاجم الهداف وائل فراج المرشح للانتقال لنادى الزمالك والجناح باسم عبد العزيز .
* افضل مدافع محمد كوفى بكل جدارة مدافع بدرجه مقاتل فدائى بمعنى الكلمه دفاع نادى الزمالك من سنين ممرش عليه مدافع بالقوه والإخلاص وده هيبان في إنقاذه الخرافى اثناء مباراه الزمالك وطلائع الجيش بالدور الأول اضافه الى تسجيل الأهداف حيث احرز هدفين وشارك في 30 مباراه .
* افضل حارس مرمى احمد الشناوى حارس مرمى نادى الزمالك دخل مرماه 21 هدف طوال 38 مباراه .
* افضل لاعب وسط لاعب نادى الاسماعيلى عمرو السوليه صاحب 26 عام وصاحب احدث صراع بين القطبين الكبيرين الا ان رغبه اللاعب رجحت كفه النادى الاهلى لكن رفض نادي الاسماعيلى إتمام التعاقد قد يؤجل الصفقه الى الموسم القادم عبر المحلل نادى الشعب الاماراتى ومنه الى النادى الاهلى .
* افضل مهاجم هو باسم مرسى هداف نادى الزمالك والذى احرز 17 هدف هذا الموسم ورغم انه لم يفز بهداف الدورى الا انه لابد من الاخذ في الاعتبار ان باسم في بدايه الموسم كان المهاجم رقم 4 للنادى بعد خالد قمر واحمد على وعبدالله سيسه وظل على دكه البدلاء 6 مباريات الى ان اثبت كفاءته واقنع ثلاث مدربين متعاقبين على جدارته بقياده هجوم نادى الزمالك واصبح الان المهاجم الأول للفريق وربما للمنتخب المصرى
* افضل لاعب صاعد بكل ثقه واستحقاق جوهره النادى الاهلى رمضان صبحى ذو ال18 ربيعا والذى احرز للنادى الاهلى 4 اهداف في اربع مباريات اعتطه 10 نقاط رغم انه كان بديل في المباريات الأربع مباره النصر والذى احز بها هدف الفوز بالدقيقه 94 ومباراه الاتحاد احرز هدف الفوز في الدقيقه 92 و هدف التعادل امام المصرى وهدف الفوز امام الداخليه , كما شكل مع محمود تريزيجيه افضل ثنائى هذا الموسم .
* محمود حسن تريزيجيه اسم كبير رغم سنه الصغير لكنه اثبت مع التزامه ومهاراته انه لاعب على اعلى مستوى ولقب اللاعب الاوروبى لم يأتي من فراغ وبالفعل انتقل اللاعب الى نادى اندرلخت البلجيكى بعض موافقه متعثره من النادى الاهلى في صفقه قد تصل الى اكثر من 25 مليون جنيها مصريا , وكل الامنيات لتريزيجيه بالتوفيق والنجاح .
* افضل حكم …الى نهايه اللقطه الأخيرة بالدورى لقطه احتفال لاعبى الزمالك بالبطوله كان الحكم إبراهيم نور الدين على رأس القائمه الا ان مشهد احتضان وفرحه نور الدين للاعبى الزمالك وتهنئتهم بالبطوله لم يكن موفقا تماما مفترض في الحكم الحياديه التامه كان فاضل بس ان نورالدين يطلع يغنى التالته يمين .
وللعلم في موسم 2005 فاز النادى الاهلى بالللقب وفى مباراه التتويج كان الحكم هو الكابتن عصام عبد الفتاح رئيس لجنه الحكام الحالي وبعد انتهاء المباره ذهب جيلبرتو لاعب النادى الاهلى لتحيه الكابتن عصام ومعانقته ألا ان عبد الفتاح صافحه وتجنب العناق وهذا هو التصرف الأمثل للحكم فلا دخل للحكم بمن فاز او من خسر حتى لو كان له انتماء لأى من النادين طالما داخل الملعب فهو بلا انتماء لنادى بعينه , ومن هنا ذهبت تسميه افضل حكم الى الحكم الشاب محمود البنا حكم هادئ واثق متميز وهذا كافى لنراه الموسم القادم على المستوى الدولى .
* افضل ادارى … الحاج احمد الصحيفى مدير قطاع الكره بنادى الجونه ورغم هبوط الفريق الا انه دائم الجهد والبحث عن مصالح فريقه بكل ادب واخلاق وثقه وحق وكان اخر مطالبه هو موقف اللاعب سمير فكرى لاعب فريق الداخليه والتي فجرها الصحيفى في محاوله منه لأنقاذ فريقه من الهبوط والتي أرى انه على حق بها الا ان اتحاد علمنى العوم والنبى يا بوريده يرى عكس ذلك .
* افضل رئيس نادى … للأسف مرتضى منصور .
* افضل لقطه … لقطه فرحه الطفل الكفيف مشجع نادى الزمالك بعد فوز فريقه بالدورى بعد غياب 11 عام .
* افضل معلق … بصراحه مسمعتش حد يستحق اللقب لو انتوا سمعتوا قولولى .
* افضل استوديو تحليلى … استوديو النهار كوره تقديم كريم شحاته ,وضيوفه الكابتن حسن شحاته و وليد صلاح الدين و علاء ميهوب .
الاسوء هذا الموسم :
* اسوء فريق يتقاسمها الثلاثى دمنهور والاسيوطى والنصر .
* اسوء صفقه هذا الموسم … خالد قمر لاعب الزمالك والمتتقل الى سموحه .
* اسلام رشدى لاعب النادى الاهلى المنتقل الى حرس الحدود , وبعد صراع مع نادى الزمالك فاز الاهلى بالصفقه الا ان اسلام رشدى لما يكون على امال وطموحات جماهير النادى
* صلاح الدين سعيدو مهاجم النادى الاهلى والمنتقل بلا مقابل الى مولوديه وهران الجزائرى كان يطلق عليه في بدايه الموسم الحصان الاثيوبى اعتقد انه قد تغير مع نهايه الموسم الى ال………. الاثيوبى
* عبد الواحد السيد حارس المقاصه اللى كل الدنيا قالتله يعتزل مع تركه لنادى الزمالك الا انه كان شايف حاجه تانيه وللأسف مكنش شايف الكوره وهى بتدخل مرماه طول الموسم
* محمد شوقى لاعب المقاولون اعتقد ان شوقى بتاع جنوب افريقيا لسه مرجعش من هناك .
* اسوء مدرب … طارق يحيى فشل مع المصرى يعقبه اقاله ثم فشل مع الاسماعيلى يعقبه اقاله وحاليا هو في مرحله الفشل مع طلائع الجيش وفى انتظار الاقاله .
جاريدو … بكل تأكيد يستحق عن جدارة لقب اسوء مدرب في تاريخ الدورى المصرى متفوقا على الالمانى هانز ديكسى والايطالى تارديللى والبرتغالى كاجودا . وصدقت مقوله مشجع اهلاوى قال يوم ماتش المغرب التطوانى يا جاريدو روح يا شيخ قلبى وربى غضبانين عليك .
* اسوء ادارى … حماده أنور ادارى نادى الزمالك , الوحش حاول يتهجم على حكم مباراه الزمالك والمقاصه واللى انتهت بفوز المقاصه 2\1 .
* اسوء تعليق … الاهلى كسب بالسحر والشعوذه ومبروك عامل عمل لحفنى يشوف الكوره اتنين , ده كان تعليق مرتضى منصور عقب هزيمه الزمالك امام الاهلى .
* اسوء استوديو تحليلى … استوديوهات التليفزيون المصرى لقناه نايل سبورت تقديم خالد لطيف .
* اسوء لقطه هذا الموسم : القاء حسام غالى لشاره قياده النادى الاهلى عقب طرده في مباراه حرس الحدود وللتذكره بس انه في موسم 93 واقعه ناصر التليس مع حسام حسن في مباراه الاهلى والمصرى القى حسام حسن الفانله الحمرا على ارضيه الملعب عقب طرده مع التليس وفى اليوم التالى قرار مجلس الاداره بأيقاف حسام حسن 6 شهور وتدريبه مع فريق الشباب و ده كان زمن صالح سليم .
– وعشان نقيم اى سلعه لازم نقارنها بسلعه مشابهه والدورىالمصرى اللى هو سلعتنا دى اللى قال عنه اتحاد علمنى العوم ونبى يا بوريده انه سلعه راكده , هنشوفوا ادام الدورى السعودى اللى قاب قوسين او ادنى من توقيع عقد البث الفضائى مع قنوات أبو ظبى بقيمه 500 مليون ريال وذلك بخلاف عقد الرعايه مع عبد اللطيف جميل بقيمه مليار و200 مليون ريال لمده 3 سنوات , انا مش بحسد ولا حاجه ربنا يزيد ويبارك انا هقول بس للى بيسأل نفسه اشمعنى هقوله اتقل تاخد الكريزه ,والكريزه هنا في الاداره فتش عن الاداره الدورىالسعودى عشان يوصل للارقام دى كان فيه ملاعب على احدث مستوى وجدول مسابقه منتظم وعقوبات سريعه رادعه للمخطىء ارقامنا بتوضح اننا سلعه مميزه قويه جوهره محتاجه جواهرجى كويس يظهرها ويسوقها .
-في النهايه وبعد موسم طويل استمر 345 يوم انتهى الدورى العام وانفض المولد بفوز نادى الزمالك فوز مستحق وتهنئه لنادى الزمالك وجماهير النادى الوفيه والتي تحملت الكثير على مدار اكثر من عقد من الزمان .
اترك لكم تشكيل الدورى عن افضل 11 لاعب هذا الموسم والتقى بكم على خير الموسم القادم 15\10 انشاء الله .
حراسه المرمى … احمد الشناوى
خط الدفاع من اليمين … باسم على – على جبر – محمد كوفى– باسم عبد العزيز
خط الوسط … عمرو السوليه– إبراهيم صلاح – مؤمن زكريا
خط الهجوم … ايمن حفنى– باسم مرسى – رمضان صبحى
الاحتياطي ( تريزيجيه– سعد سمير – حازم امام – عبدالله السعيد – حسام غالى – وائل فراج – احمد الشيخ )
المدرب الكابتن إيهاب جلال .
\