أنا ذنبي ايه

؟؟
قتلوني ليه؟؟
وليه يفجروا جثتي
علي الارض ليه
انا كنت بحمي الوفود
بحمي ارضي ورب المعبود
ليلي شمعه..فجري مولود
فرحتي مزوقه كل الوجود
غدرا بيه وما بقيت موجود
وقعت جثه علي الارض
في وضع السجود
رفعت ايدي للسما
شكرت رب المعبود
نولت الشهاده
ولو مليون مره
بعمري اجود
فدا تراب بلدي
اقضي كل الفروض
اوعوا تقولوا مات
لا ..لا ..موجود
أنا في الجنه .. مولود
بس امانه ماتبكي يا امي
وتقولي ابني مات
مات اللي كان يحمي الحدود
انا يامه حي.. افرحي
وماتقولي ابني فات
علقي يلا الزينات
امسكي في ايدك عصايه
وحبه بلونات زعرتي يامه
وارقصي وادعي الستات
قولي ابني بطل مش من الأموات
احكي عني يامه وقولي
وغني الاغنيات قولي مات
فدا تراب بلده
ابني راجل ..ابني بطل
بكل اللغات
اتوضي يامه وصلي واوعي البكا
ينسيكي انك تقولي الذكريات
قولي عارفين مين اللي مات
واللي عدي واللي فات
ده شهيد..مش من الاموات
معلش يامه..معلش يامه
عارف ان حلمك مات
وان قلبك بتقطع في سكات
غدروا بيه وبقيت رفات
علي الارض واقع فتات
شوهوني..شوهوني
اي دين اي مله يعذبوني
واصبح رفات
اصواتي صبحت سكات
خطواتي وقفت
والقلب مات
خرس اللسان
اتقلبت حياتي ممات
وكل شيئ فيا مات
بس مش ندمان يا امي
واللي جاي احسن من اللي فات
حتي لو دبحونا مئات
يقتلونا يدبحونا مش خايفين
دول حبه ملاعين
و اصلهم ظالمين
طايحين شمال ويمين
وهما مفكرين انها قوه
والقوه دي علي مين
دا احنا مصريين
ياما حاربنا وياما خوضنا
معارك ورجعنا منتصرين
ودي قله تافهين
مستقوين بحبه قنابل وملتوف
واسلحه خايبين
وادي احنا اهوه شاهدين
وهاندافع بالملايين
حتي لو اكلونا السفاحين
احنا مش ساكتين
حتي لو دمنا كل يوم
نزف من الشرايين
روي تراب الحنين
لأخر قطره دم هندافع
عن ست الحلوين
هي امي ومالي غيرها عناوين
ومالي حضن غير حضنها الأمين
مصر محروسه من رب العالمين
محروسه ليوم الدين
احنا التاريخ والحضاره
والكل عارفين
جنودنا اسود ومهاره
وكلهم شاهدين
احنا اساس الامم
ومنبع الاديان
ومصر فوق الجميع
يشهد علينا الزمان
بين الامم احنا بلاد الاصاله
وشجاعه الفرسان
احنا بلاد العداله
والعدل بالميزان
ناكل ونشرب فيها اعيان
ما احنا خير الاوطان
الحضاره شعبنا
ومنها اتخلق الانسان
ميقدرش علينا انس ولا جان
ولا يهزنا زلزال ولا بركان
دا احنا ارض الكنانه
يشهد علينا الزمان