تنهيدة عاشق

كلمات الشاعر / محمد عبد الفضيل
أنا المدبوح في محرابك
رموه نساك
ومش طاهرين . ....
***
وجيت أسجد
علي بابك
لاقيتك ما ألتفتي آمين .
***
أنا طاهر ومش طاهر
أنا كالطير بيتظاهر
تملي يطير فوق البساتين ..
***
وبيغني كما بلبل
رماه القهر
فوق غصنين...
***
بيحضن شوكه مرميه
ومشتاقه لحنيه
لكن ورودها
تعشق مين ....
***
وبيداعب خمايلها
تملي بشوق يحن ليها
وعينه ما تشوف غيرها
ساعات علي الناي
يغني ليها
وبترده وبتصده
تملي تغني لحن حزين ...
***
وملعونه ضفاير
شعرك الأسمر
كما توكه بتتمسمر
علي وتد النخيل في الطين ...
***
آمنت كتير
بحلو كلامك المعسول
كما التلميذ
شايلك في الهوي كشاكيل
وراصص بين سطور الورد
بوسه علي الخد
لكن السطر من حبره
سأل حبره
بتعشق مين ...
***
بتشرق شمسك الوردي
تداعب ضحكه ع خدي
وبتنهد ومين قدي
وباحضن ضلك الفضي
كما بردي
بيطلع من قحوله طين ....
***
وبستفهم أنا منك
صحيح إنك
مفيش منك
في ذكر العشق والعاشقين ..
***
ولو طارت علي غصنك
طيور الكون
مفيش في الكون ...
طيور راح
تنتمي لعشك
لأني وسط كل الكون
أنا المكتوب علي نقشك
أنا همسك
أنا عشك
أنا اللي
بقلبه بيحسك
أنا اللي
عمره ما يغشك
أنا اللي
بالهوي مفتون ....