بعض اللى قابلوا الحُب

الشاعرة سهام سامى:
الاوله :- قلبين
و التانيه :- إحساس
التالته:-المكتوب
و الرابعه:- مفارقين
الخامسه:- بنخاف
و السادسه:- عايشين
الاوله:- قلبين بيكملوا الجمله
و التانيه :-احساس و الفرحه بالجمله
التالته:- المكتوب عكس اللى حاسينه
و الرابعه:- مفارقين و الحزن عارفينه
الخامسه:- بنخاف قولة كلام الناس
و السادسه:- عايشين بنموت الاحساس
********
قلب الولد عاشق
و البنت زيه تمام
كُتر الألم قاتل
و الخوف مالوش عنوان
إكمن قلبك حُر
عايش ورا قضبان
مسجون و شارب مُر
من قسوة السجان
*******
لو كان نصيبك سجن
إرسم على حيطانه
حِلم العقيم بالإبن
و اُحضن فى اركانه
و إرسم كمان شمسين
واحده عشان بكره
و التانيه للذكرى
يمكن يكون زيك
مليون سجين و سجين
********
نُص البشر عايشين
علشان يلاقوا حياه
و بيسألوا التايهين
على الطريق إياه
نُص البشر نيكوتين
طايرين مع الدخان
عايشين بشرط الموت
و بيدفنوا الاحلام
*********
شوف الحياه من فوق
هتلاقى تحت مفيش
واحد بيقتل أخوه
علشان رغيف العيش
و التانى عاش ميت
لما ضميره لاغوه
************
نِرجع لمرجوعنا
بعض اللى قابلوا الحب
قالوا ان عُمره قَصير
بعد الشَبَع جوعنا
و اتبدل التأثير
أما بقى التانيين
عايشيين بيتمنوا
يمكن دموع العين
يطلع هزارها تقيل
و الفًرح لابس وش
و كأنه حزن كبير