أنا و هى

الشاعرة سهام سامى
أقولك حاجه عن نفسى:-
انا ما بقتش أشوف نفسى بقالى كتير
و لا هى بتسألنى عن الأحوال
بقالها كتير مخصمانى
بنشبه بعض بالملى
و مختلفين أوى تملى
*******
أنا الضحكه اللى مهمومة و متناقضة
و هى حزنها فرحان و متفائلة
أنا خوفى بيرسمنى فى ألف طريق
و هى مِمَوِته خوفها بقلب جرئ
أنا عقلى ولى الأمر و السُلطة على المواضيع
و هى قلبها السيد و بيحول خريفها ربيع
**********
أنا و هى صحيح واحد
لكن ناتج لحاصل جمع أصله اتنين
شيزوفرينيا بتجمعنا
نعيش دنيا بلا معنى
نصيبنا نكون على طريقين
لكن هى و أنا راضيين
بشكل القسمه على الاتنين
عشان دايماً نكون واحد
********