قصيدة .. من بين الغيوم طله

وبتفرج على الكائن
وع المكنون
ف قلب الكون
حكاوي الناس
بتنهي الشكل
والمضمون
وبتأمل
الاقي سكون
وليل مسكون
بجبن من القلم
والفكر
وقتل الحرف
للمعنى مالوش
ديه
وقلب شريد
بيرسم سهم وهديه
ويرسلهم على العنوان
وما يوصل
وصحبة ورد
تتصدر مع الاحلام
وعقل شهيد
بيتدارى ف وسط
لغم ؛؛
وكلمة حق متشاله
مع الايام
ووش بريء
بيضحكلك وبتشوفه
كأنه عدم ؛؛
وكف يتيم
و بيدور على بداية
وحلم قديم
و بيشاور بضحكاية
وديه حكايه
خيالها بعيد
وقلب ربيع
مصاحبه خريف
وبيساومه على نهاية
وبنت وواقفه
ف محطة
وشاب بيرسم الخطة وصوت ازعااااج وفجر جديد
لليلة عيد
بترسم ضيه دمعاية
وحكمة ودايرة ع الملايين
وعمر حزين
بيتندم على اللى كان
وصوت حرمان
ووقت أذان
يارحلة وبعدها فوقان
يقول للجي
كان يا ما كان