عودة السقا

يا شعبها الغالي اجمعوا
السقا راجع من جديد
عا الكتف شايل قربته
ماليها من ميه في بير
محفور جديد علي سكته
ماشي ينقّر علي البيوت
و يفضي الميه ف زيار
لعيال غلابه مصهم الخوف والعطش
قاعدين علي ضي الشموع
عاملين ايديهم مروحه
فاتحين كتب
علي قصه مليانه خرف
تحكي عن ضي القمر
اللي مرشوش عا النخيل
و نخيل طويل
مادد جريده للسما
فرحان بانوار السفن
اللي بتلمع م الفرح
جواها ناس
جايه بتحلم بالدفا
في عيون حبايب ضمهم
مركب صغير اتملي
ضحك و ونس
قاعدين بيحكوا للسمك
قصه غرامهم حبهم
وابو الهوا قاعد بعيد
يضحك لهم
مادد ايديه يضمهم
ولما تخلص الحكاية
و يقفلو تاني الكتب
يلقوا شق طويل طويل
وميه راكده
الشمس شربت نصها
والشجر ريقه نشف علي شطها
والنخيل ممدود بيبكي علي البلح
والسمك كله انتحر ف بطنها
والناس صيامها انجرح
لما شربت م الدموع
واترحموا
علي الارض الطافحه بعماير
والهوا دخان سجاير
والربيع اللي انتحر