محدش فاهم حاجه خالص

بقينا نصحى الصبح دلوقتى واحنا بنفكر نروح نتظاهر فين النهارده وياترى الموضه ايه هل اعتصام صامت ولا شعارات ولا هتافات ولا ضرب ولا تسخين ولا فتنه طائفيه ولا ايه بالظبط محدش فاهم حاجه.. تنزل على المصالح الحكوميه تلاقى ناس بتشوف شغلها وكويسه وعايزه تقدم خدمه لاى حد، وتلاقى ناس عامله اضراب وبتقول مش هانشتغل غير لما ناخد حقنا، وناس تانيه واقفه بتتفرج بتشوف مين اللى هايكسب الاضراب ولا الناس اللى شغاله علشان يعرفو ها ينضمو لمين. كل ده اكده ليا الموقف اللى حاكيه دلوقتى... كنت متواجد فى التليفزيون فى البهو شفت بعض الاشخاص معتصمين وكاتبين على صدورهم بادج ثوار ماسبيرو منهم واحده بنوته جميله بتشتغل مصممه ازياء ودار بنا حديث قصير وقولتلها هو انتو مين وبتعملو ايه؟ ردت: احنا مجموعه من الموظفين عايزين نغير سياسات التليفزيون وقياداته وحتى البرامج والمسلسلات وكل حاجه على شاشته. وهنا انتابتنى حاله من الفرح فى ان هناك اصرار على التغير، ولكن قفز الى ذهنى سؤال وهو ان كل المطالب دى بالفعل اتحققت يبقى ليه الاصرار على البقاء وتعطيل المصالح؟؟!! ثم وقفت لحظه وسالتها انتى بتشتغلى فى قطاع ايه فردت قطاع الانتاج فقولتلها طيب على حد علمى ان رئيسه القطاع اللى كان عليها خلاف من العاملين تركت القطاع حتى قبل نهايه خدمتها وتم تكاليف محمد عبدالله رئيس الشئون الماليه هو أي نعم علاقه بالفن زى علاقتى بسفن الفضاء وانتو كده ولا كده فى فتره ركود خصوصا ان مفيش ميزانيه لقطاع الانتاج السنه دى والراجل جاى علشان يظبط المسائل الماليه وبعد كده اكيد ها يجيبوا حد متخصص، لان قطاع الانتاج عنصر فاعل فى الدراما فى مصر وفى اثناء حديثنا اقترب منا احد زملائها فى مجموعه ثوار ماسبيرو وتعرفت عليه فهو مخرج فى نفس القطاع لم ياخذ فرصته سوى فى اخراج عده سهرات منذ زمن بعيد ولكنه لم يوفق، ومنذ ذلك الحين وهو ثائر يكتب شكاوى وتظلمات وبالطبع لم يستمع اليه احد، وسالته ايضا وماذا بعد؟! القائمين على النظام بيعملو اللى يقدرو عليه ولان الناس لسه متواليه مقاليد الامور بعد 30 سنه فساد فصعب انهم يحققوا احلام الشعب فى خلال 6 شهور ولا حتى ست سنين. فرد عليا وقالى: انت عايزنا نسكت وما نتكلمش وما نطلبش بحققونا.. لا احنا ثوار وها نفضل ثوار لحد ما الشعب كله ياخد حقه. طيب ياسيدى براحه انت عايز ايه دلوقتى من الناس اللى ماسكه الحكم؟؟ فردد نفس الكلام بتاع زميلته ورديت عليه بنفس الرد واكدت ليه كلامى بان رئيس الوزارء غير سامى الشريف لما الناس كرهته ولما اثبت فشله فى تولى المسئوليه هو والعديد من قيادات المبنى بس نظرا لضخامه المبنى و كبرعدد العاملين فيه يبقى نعمل بكلام الشيخ الشعرواى بان الثائر الحق هو الذى يثور ليهدم الفساد ثم يهدأ ليبنى الامجاد اما نظام ثوره ثوره وزنقه زنقه دى مش ها تخلينا نتقدم ابدا. فلقيت الاتنين بصولى بامتعض شديد وسابونى ومشيوا بعيد وكأنى مصاب بمرض معدى!! يبقى بردو محدش فاهم حاجه بس خلاص.
ابوخضر الهوارى