مقال يبحث عن عنوان

ممكن ..
أختار لمقالي عنوان ..
" خروف"
رح يكون عنوان مثير و جذاب
وطبعاً ده هيعجب ناس هتمدحني .. و يغضب ناس هتجرحني
و ناس هتقول عليّا "شريف "
و ناس هتقول عليّا "سخيف"
و ناس تقول بطبعه " رؤوف"
و ناس تقول دا أصلُه " ... "
لكن ده برضو مش مُشكِل..
ولا يزعَّلني من أصله..
و قالوها الفلاسفة زمان : " أنا ممدوح ؟! إذن أنا موجود ..
و لو مذموم أنا برضو هاكون موجود "
و ممكن أطلع من دي الحالة
وأختار لمقالي عنوان ..
"زبالة"
لكن برضه ده بيكون عنوان مستهلَك
كلمة زبالة كلمة مستهلَكة بالفعل.
على فكرة ..
لو كانت الزبالة ضرورة
واجبة و مفروضة علينا
طيب ليه ما نفكرش نستهلك الزبالة "نفسها"
بدلا من استهلاك "لفظها"؟!!
يعني ممكن نحوّر و ندوّر الزبالة بدل ما بنحوَّر و ندوّر الكلام
يعني تصير الزبالة منتج
ويتصدَّر لكل العالم ..
بدل ما بنصدَّر كلام !!
وعلى فكرة كمان ..
مقالي خلاص كده كويس ومش محتاج كلام وحروف
وعنواني.. "ولا زبالة .. ولا هُوْ خروف"
أنا عنواني حلو و شيك
وفيه كده بهجة !!
و كمان فيه قيمة.. وإفادة..
أنا عنواني اسمه ..
" إرادة"
عنوان ..
مش شرط يكون تاندة
إن شالله يكون شمسية
مظلة ..
شجرة ..
أو حتى..
ضلّ حيطة!!
آهو أي حاجة
حماية ..
حصانة
دِرْواية ..
تخليني واقف مرتاح ..
في ساحة تكون شويّا براح ..
ماهيش زيطة
أنا واقف في وسط الكل
هناك على مشارف "ظِلّ" ..
ما بين المدح و بين الذمّ
صباح الفُلّ..
أنا بالفعل عدّيت العتب دوّت
دخلت خلاص بعزم و قوة و " إرادة"
لكن؛ من قبل ولا كلمة ..
إيه معناها دي الكلمة ؟
" إرادة"
" إرادة"
" إرادة"
أنا هاشرحها بالعربي
وبالبلدي ..
يعني بيُسر و بساطة..
الإرادة دي تماماً زي شرف البنت
الإرادة عود كبريت بيولع في لحظة الإختيار
تختار تكون متبوع أم تختار تكون تابع ؟
لمّا أخترت تكون متبوع ..
يعني اخترت تكون كده !! واد" مان" يعني "حتة عيّل راجل "
هنا بيتحول عود الكبريت في لحظة الإنفجار
لشعلة نار
ويتحوّل المبني للمجهول ..
أوااام ..
لفعل و فاعل .
ويتحوّل المفعول به ل "واد جدع" كده وراجل !!
وشالوا الحمام .. و حَطُّوا اللئام
و فين تروح يا بطل ؟!
هُوّا التحرُّر كلام ؟
و الّا المباديء عمل؟
حَطّ الحمام و شالْ
شال الحمام و حَطّ
لو ناوي تحصد يقين
إزرع بذور الشكّ؟!!
هُوّا انت أصلاً إيه ؟
وهيّا الدنيا إيه؟!
غير بس عود كبريت
محطوط على المَحَكّ !!
ولمّا اخترت تكون تابع ..
بتكون دي اللحظة اللي بتتحول فيها النار إلى دخان
فين تروح يا غلبان؟
مين جاب سيرة الخرفان؟!!
وإيه علاقتها بالموضوع ..
الخروف مهمن يكون خروف ..
لكن برضه عنده إرادة
عنده إرادة يكون خروف !!
والإرادة : شرف البنت
وشرف البنت : عود كبريت
والكبريت في لحظة ثورة بيكون نار
ويا بلدي ..
ولو لحظة تنام النار
بقيت أنا وانتِ في التوهان
وفين بقى لمّا ...!!
فين لمّا
يبدأ ينجلي الدخان؟!
***