ذات الرداء أبيض

سافرت مع السهر رحلة
وروحت بعيد
بعيد عن أي عين سمرا
بتشغل ذره من فكري
بعيش جواكي في مغامره
وروحي مخاطره وياكي
يا قوه قادره تقلب كوني
يتقسم أوام ليكي
جذبتيني معاليكي
نهاري ضي في عنيكي
وليلي سماره متكحل علي رموشك
عيونك سحر أو شفره
ويمكن لغز، فزوره
عيونك نجمه منظوره
بيتمناها عشاقك
عيون الخلق غيرانه
وحاسدينك وقاصدينك
وكل ما زادوا حسادك
يزيد حسنك ويعلي عندهم زينك
دعيت والدعوه وصلالك
يسخر مني طيف يجي علي بالك
جلبت الحظ يركعلك علي بابك
يا جبروتك
يا أجمل لحن متنغم دفا صوتك
أنا عاشق وبسرح جوه ملكوتك
قوليلي ازاي ؟!
بقيت مهووس بعزف الناي
برغم إني مبعزفشي
مبعرفشي
أغني غير بإلهامك
قصايدي وحيها كلامك
كتير بسرح وأبص لفوق
بشوف وشك بيضحكلي
وشعرك ع السما مفرود
ومترصع نجوم لامعه
بنادي عليكي لو سامعه
تبكي الليل يمطر شوق علي جبيني
ابوس ايده وأطلعلك
كفايه الغربه قتلاني
يغيب الليل أدوق الويل
ويرجع ليلي من تاني
أنا عارف
بعادك عني من زهدك
هيجي اليوم
وأدوق اللذة من شهدك
وأعيش عهدك
ونبدأ قصة
" يا ذات الرداء أبيض "
راويها الضحك والفرحه
مابيني وبينك الطرحه
هشيلها لاجل ماتغزل ف أوصافك
هيجمعنا مكان واحد
بعيد عن زحمة العشاق
هيجمعنا نفس واحد
هيحيي قلوبنا يا حسناء