حكالنا حنفي بن تامر وقال : رحت لعم مليجي , محلل استراتيجي , يقدر يحل الاللي , اول ما شافني قال لي , : انت برضة تانى ؟ , خير ؟ عايز ايه تاني ؟ , قولتله : حضرتك فاكرني ؟ , قال لي : فاكرك يا ابني , انت الشب الدحلاب , اللى غاوي زن , جيت تسالني عن , رايي ف الانقلاب , العسكري ..صح ؟ , قولتله : برافو صح , وساعتها حللتي , الموقف وقولتلي , عن اصل الحكاية , قال لي : وساعتها انت , بكل قلة ذوق , وغباء خالفتني , ومشيت وسيبتني, وانت مناخيرك فوق , ساعتها انا زعلت , منك اوى واتضايقت , انت لك وش وعين , تجيني ؟ قولتله : اه , خليها على الله , قال : فعلا الناس نوعين , (فيه ناس تتخدم , وفيه ناس تتردم ) , قولتله (خير الناس , انفعهم للناس ) , كله هيتردم , يا بيه تحت التراب, مش كلنا من تراب ؟ , وكلنا هنموت , بعد ما عمرنا يفوت ؟!! الموت كأس كل الناس شاربه ..والقبر بيت كل الناس ساكنه صح والا لأ ؟ , قال لي :عندك حق , المهم خير ؟ , قولت : انشاء الله خير , الناس الاخوانية , اللى ف رابعة العدوية , دول نظامهم ايه ؟ , قال لي وهو زعلان , : مش كلهم اخوان , فيه منهم اللى ضد , حكم العسكر المغول , وبيهتف وبيقول , (يسقط حكم العسكر ) !! , مسألة كرامة وعند , وفيه منهم اللى ضد , (السيسي ) الانقلابي , ومنهم اللى نوى موته , علشان حس ان صوته , الحر الانتخابي , الشعبي النزيه , اللى اختار بيه , دكتور (محمد مرسي ) , كمرشح لكرسي , الرئاسة اتسرق , بالانقلاب والغصب , واللوع والنصب , ف الواقع وع الورق والعسكري عنده عقيدة , قاسية اوى وشديدة , بالفعل وبالقول , ان كل دول , عالم فوضاويين , وناس ارهابيين , بيعطلوا المسيرة , ويوقفوا الاشارة , وعاملين غاغة وغارة , وحكاية وسيرة !! , وانه اتغيرت الدنيا , بعد تلاتين يونيه !! , والا انت ايه رايك ؟ , قولتله : انت ايه رايك , ف الدم اللي بيسيل , والبلطجة والتقتيل؟ , قال لي : عشان فيه تخبيط , ومعادشي فيه تخطيط , كله بيعادي كله , كله بيضرب في كله , اتشتتنا تشتيت , وكل منهي فشتيت , فاكر انا قولت ايه , قبل كدة يا بيه؟ , ؟ قولتله : لأ؟ قولت ايه ؟ , قال : قولت السياسة لعبة , زي اى لعبة , وعشان تلعبها صح , لازم تفهما صح , وتمارسها مرات , وتاخد فيها خبرات , لازم تكون حاسسها , ومذاكرها ودارسها , ينفع تلعب شطرنح , بمهاره وتكسب فيه , وانت مش فاهم فيه , حتى الف به شطرنج ؟؟ , ينفع تكسب الحق ؟ , قولتله : طبعا لا , قال لي : لكل لعبة , قواعدها واساسها , واساليبها وناسها , وخططها السياسة لعبة , مكسبها ما بيدومش , والاخوان مالهمشي , خالص ف السياسة , يا ابني السياسة , عايزة دهاء وحصافة , مش خطابة وفصاحة !! , عايزة انتباه ونصاحة , عايزة اللى مدقدق فيها , مش اى حد يلعبها , ويدخل في ملعبها , لان الغلطة فيها , بتكلفك مال ودم , ووقت وجهد وهم !! قولتله : طب ايه الحل , قال لي : ياسيدي الحل , انهم يبعدوا , ويبطلوا يعندوا , ليه بيعاندو الساسة ؟ , ويلغوصوا ف السياسة ؟ , اتجهوا يا اخوان , كما كنتم زمان , للانشطة الدعوية , دينية واجتماعية , زي كفالة اليتامى , ورعاية الايامى , واطعام الجعانين , وكساء المحرومين , وعلاج العيانين , وتحفيظ القران , دة صدقوني احلالكم , واشرف لكم وابقالكم , من معترك السياسة , ومن كرسي الرئاسة , وكراسي البرلمان قولتله : طب والشرعية؟ , قال : قصدك القرعية !! , (مرسي) استمد سلطته , اياها وشرعيته , من خلال حواراته , وقعداته وصفقاته , مع (عمر سليمان ) , و(طنطاوي ) و(عنان ) , ما استمدش السلطة , من الشعب ودي غلطة , وقعوا فيها الاخوان , غير كدة كمان , كان رئيس اخواني , وبدوره كاخواني , خدم الاخوان بس !!! , لا سمع ولا حس , بهموم الشعب الجائع ,كان لا شايف ولا سامع , غير غنوة (صلي صلي) , كان كل جمعة بيصلي , صلاة الجمعة فجامع , شكل ..آدي الرئيس , فرحان انه رئيس , علشان بياخد جولات , وبيطلع رحلات , بين الدول والجوامع !! والمجلس العسكري , هو اللى خطط , فاكر انت مخطط , المجلس العسكري ؟ ,..(شفشق ) للخارج يهرب , و(مرسي ) يمسكها تخرب , و(طنطاوي ) و(عنان ) , يبقوا مستشارين , يخرجوا متكرمين , بسلام آمنين , و(مبارك ) في الكراكون , في الحفظ وفي الصون , فاصل وسادد الفيشة , وعايش احسن عيشة , والفلوس تتهرب , والسولار يتسرب , واحنا بقا الملايين , قاعدين مستمتعين , ب (لميس ) و(عمرو اديب ) , وكلام (فريد الديب ) , وبرامج (باسم يوسف ) , وبرامج استاذ (يوسف , الحسيني ) الغريب !!..., ومسلسلات (غادة , عبد الرازق ) كالعادة , واستعوض ربنا , ف الشباب اللى ماتوا , اعتبرهم ماتوا , في حادثة بسبب قدرهم , والا اقولك اعتبرهم , اصلا مش مننا !! ..., ادي شرع الله , الله على كدة الله !!! لا السارق يقطعوا ايده ولا القاتل يعدم لاتنين في شرم بيتعالجوا وبيقضوا لهم هناك يومين !! لحد ما ظهر (السيسي) , جاب(البرادعي) بدلهم , وبالقوة عزلهم , قولتله : طب ما (البرادعي ) , عمل صفقة مع (السيسي )؟ , اهوه.. عينه (السيسي ) ؟, قال لي : بداية (البرادعي ) :- ان الاخوان سابوا المشير (الحمار) واتشطروا ع (البرادعي)..بالحوار !! مش برضة الاخوان , سابوا كل الثوار , وراحوا عملوا حوار , مع (عمر سليمان )؟؟!! , وسابو دم الشهدة , وقفزوا زي البورادة , فوق الثورة الجميلة , قفزة منيلة بنيلة !! ...رايحين تعملوا حوار , على حساب الثوار؟؟!! , مين كونكو وشكلكو ؟ , مين فوضكو ووكلكو؟ , ترغوا باسم الثوار ؟؟!! , يا ابني هقولك حاجة , طول عمر (البقاء , للأقوى ) والشقاء , للأضعف المستكين , الغلبان المسكين , اللي ما يملكش حاجة ...,الفنان المهول , (عزيز علي ) بيقول :- (عشنا وشفنا بها الدنيا الحق للقوة ....ها النظرية العملية جوة مروة من جا ادم للدنيا هو وحوا الحق للسيف المردود ..والعاجز يدور شهود ...واللي يحكي حكيه مردود ...الا المدفع والبارود !!!) اللى اتاخد بالقوة , يترد بالقوة , مفيش فبلادنا حوار , حواراتنا ضرب النار , على راي عمنا نزار ( بلاد يدير المسدس فيها شئون الحوار ) ...المسدس هه ؟ , ونفس المعنى دة , قاله زمان (المتنبي ) , مش بيقول (المتنبي) :- والسيف اصدق انباء من الكتب ..في حده الحد بين الجد واللعب مش تقول لي حوار !! , هما استغلوا الحوار , وقفزوا فوق الثورة ,طب فاكر لما الثورة , قامت قالوا ايه ؟ , قالوا مش نازلين يا بيه , واما حسوا ان ( مبارك ) , هيقع جم ضد (مبارك ) !! , واما اتنحي ( مبارك ) , مشوا الناس م الميدان , رغم ان مطالب الثورة , كانت (عيش حرية , عدالة اجتماعية) , مش بس رحيل (مبارك) , الا ان الاخوان , شافوا كرسي الرئاسة , فاضي ففكروا بخباثة , ياخدوا مكان (مبارك ) , كان حقة الاخوان , يصفوا نظام (مبارك ) , ...لكن الاخ (مرسي ) , فرح اوي بالكرسي , ونسى انه بتاع (مبارك ) :- قبل ما تقعد ياريسنا على كرسي الرئاسة المتوسخ المتلطخ..... امسحه معاليك لا هدومك تتوسخ منه وتطولك نجاسة وتبقى نجس ومعفن زيك زي اللى قبليك وابكي ونوح وان, وافهم من كدة ان , نظام سيدنا (مبارك ) , قائم دة حتى (مبارك ) , عايش وخالي البال , وصحته فل و عال , راجع نظام (مبارك ), يستعيد قواه , وينتقم بحدة , وبغلظة وبشدة , من كل اللى اتحداه , وخبط فيه زمان , بدأها بالاخوان , وبالاسلاميين , بكرة العلمانيين , بعده اليساريين , وهكذا وهكذا , لحد ما يقضي خالص , على القوى الثورية , والحركات الشعبية , بالفتنة والمهمزة , والتنفيض والحلاقة , مش دي (الفتنة الخلاقة ) , سياسة (فرق تسد ) !! , واهوه المجلس بيسد , وبيعمل كل حاجة , بعدين هاقولك حاجة ,جه منين (السيسي) ؟ , جه نتيجة تزاوج , نظامين سياسيين , غير متجانسين , ونتج عن التزاوج , دة نظام عقيم , مفكر نفسه عظيم , اللى هو (السيسي) !! المشير ( الحمار ) ممثل نظام الرئيس المخلوع + الاخوان ( الخرفان ) ممثلي نظام الرئيس المعزول ____________________________ السيسي ( هجين ) بين النظامين الفاسدين طبعا مش انا اللي باقول , هنا المعادلة بتقول :- ف الطبيعة : حمار + حصان يخلفوا سيسي وف السياسة : (حمار) + (خرفان) يخلفوا (سيسي) ادي الدايرة والدورة , مافيش حاجة اسمها ثورة , سلمية اسلامية , فيه وقفة سلمية , فيه تظاهر سلمي , واحتجاج سلمي , لكن الثورة دموية , بتقوم تهدم نظام , علشان تبنى نظام , بيكون فيها خساير , ف الارواح و الاموال , وتدهور الاحوال, ويكون ليها بشاير , ف التنضيف والتطهير , والتنمية والتطوير !! , وساعتها يبقى الشعار في كل الاشعار :- الفساد كان للركب ...اه دة كان واصل للمفاصل يلا نعلق للرتب ..............المشانق والمقاصل فالحل عمره ما يكون , بالوقفات السلمية , فمدان رابعة العدوية , وهتافات الدقون , وصيحات الاخوات , المحجبات ' الحل ف البندقية , تطلع عصابة خفية , ترصد تحركات , ( السيسي ) هو وجماعته , ويقتلوه مع جماعته , بالآلي والرشاشات , ...زي اغتيال (السادات ) , وباقي الاغتيالات , اللى هما اغتالوها , دة الفكر الماسوني , الامريكي الصهيوني , مش ( محمد على ) , عزم المماليك ع القلعة , وعمل (مدبحة القلعة ) , وقتلهم كلهم , عن بكرة ابيهم , لازم يتغدى بيهم , قبل ما يتعشوا بيه , كان راجل نبيه , ,,,,,,اهو دة اللى عمل النهضة , مش قعد يقولك نهضة , لحد ما اطاحوا بيه !! , الفكر الماسوني , الامريكي الصهيوني , دة فكر مافيش بعديه !! , قال حنفي بن تامر : بعد ما قال ماسوني , امريكي صهيوني, فهمت انه عميل , لامريكا واسرائيل , قولتله : حرب العصابات , ما بين الميليشيات , والحركات والجماعات, ودي بتكون ف الخرابات , في سوريا والشيشان , , وشيكاغو وباكستان , وجبال افغانستان , والعراق كمان , لكن مصر محروسة , بالاوليا محروسة , فيها تغيير سلمي , بالاسلوب العلمي , بتفاهم وهدوء , قال لي : هأهو بهدوء ؟ , ايه ياعم (عماد اديب ) , مصر دي عايزة واد ديب , يطلع بفكره الجديد , وبقلبه الحديد , يكبر كدة ويسيطر , وياسس ويغير , مصر المتخلفة , قولتله : متخلفة؟ , مصر ام الدنيا , وهتبقى قد الدنيا ,قال لي : اللى ما شافش دنيا , بيقول مصر ام الدنيا , وانت كدة يا مصري ؟ , مفكر نفسك عصري , وانت فدنيا غير الدنيا , من يوم ما وعيت ع الدنيا , قولتله : أثبت مكانك , اخرس قطع لسانك , يا عميل يا مسيء , لبلدنا اياك تسيء , بكلامك لمصر , الحرة وشعب مصر , قال : بطلوا نعرات , واغاني وشعارات , دي حاجات ما تجيبشي نصر !! قولتله : شكرا يا سيدي , بعدين شوحت بايدي , ومشيت من قدامه , وانا مش عاجبني كلامه , مش كل شيء بالقوة , وبدراعات الفتوة , كدة هتبقى فوضى , ما بعدها فوضى , امال ليه ربنا , بعظمته نزل لنا , كتابه المبين , فيه احكام وقوانين , علشان نكون عاقلين , مع بعض ومتعايشين , واحنا متفاهمين , مش واحنا مهابيل , ربنا خلقنا ليه ؟ , اتخلقنا عشان ايه ؟ عشان نعمر الارض ..زي ادم وحوا؟ والا عشان نقتل بعض ..زي قابيل وهابيل ؟...والختام
