مكملين

طب و بعدين يا شعب مصر يا طيب يا مسالم يا جميل حنفضل كده سلبيين
و مسلمين لها الطارشة
احنا بنضيع كل يوم تحت حكم مرسي و جماعته
كام كارثة حصلت من يوم ما مرسي قعد ع الكرسي
حط نفسك مكان الضحايا كان ممكن تبقي واحد منهم
ليه تستنى لما تبقى من ضمن الضحايا
حيبقي شعورك ايه لو فقدت ابنك ولا اخوك ولا اى حد عزيز عليك من غير ذنب
حط نفسك مكان كل اهالى الشهدا
اللى ماتوا عشان كل ذنبهم انهم بيحبوا الكورة
و اللى ماتوا ع الحدود و هما صايمين قبل حتي ما يبلوا ريقهم بشوية مايه
و اللى ماتوا غرقانين
و اللى ماتوا فى حوادث القطارات و ما اكثرها فى عهد مرسي
و اطفال اسيوط الابرياء
و غيرهم و غيرهم
قائمه الضحايا كبيرة جدا
و من الصعب احصائها
حط نفسك مكان الشاب اللى ذى الورد اللى اهله صرفوا عليه دم قلبهم
و بعدها قعد جمبهم لا شغله و لا مشغله
للاسف كام مليون شاب عاطل بيموتوا بالبطيئ
و لسه فيه موظفين فى الحكومه بيقبضوا مليون جنيه فى الشهر
حط نفسك مكان البنت اللي كبرت ووصلت ل ال 35 سنة
و الهم كبرها اكتر و اكتر و هى لسه بتحلم بابسط حقوقها
حضن يضمها و بيت يجمعها بشريك حياتها
و طفل جميل يحسسها بأمومتها مع كل مرة يقولها فيه يا "ماما"
اقول ايه ولا ايه
كل حاجه زى ما هي و يمكن كمان اسوأ
الاسعار فى ارتفاع و المرتبات زى ما هيا
البطاله زى ما هيا
العنوسه
احترام المواطن و احساسه باداميته
كم مرة مرسي حنث باليمين اللى حلفه قدام الشعب و من قبله قدام ربنا
كام مرة مرسي خد قرار و رجع فيه
كام مرة مرسي خالف وعودوه
كام مرة مرسي خيب ظنك
تقدر تقولى ايه القرار اللي خده مرسي طول فترة رئاسته الميمونه فى صالح المواطن المصري البسيط الغلبان محدود الدخل الكفران اللى مش لاقى لقمه العيش
انا مش ضد مرسي كشخص
لكن ضد سياساته اللى جابت الشعب ورا
لسه هنستنى ايه تانى من رئيس عروسه ماريونيت فى ايد المرشد
اوعى يا شعب حد يضحك عليك و يصرفولك المرتبات يوم 23
عشان المولد يوم 24
و كمان بالاخص يوم 25 يناير اللي عاوزين يحتفلوا بيه
يحتفلوا بيه على ايه على خيبتهم
هو ايه اللي اتحقق من اهداف الثورة
انا بادعو و باحشد الجميع للنزول لكل الميادين يوم 25 يناير
الحريه لا تباع و لا تشترى الحريه تاخذ بالقوة يا شعب
لازم هتافنا يكون و احد و كلنا هدفنا واحد ان مصر ام الدنيا ترجعلنا تانى
و الله من وراء القصد
مكملين
ثورة ثورة حتى النصر
ثورة فى كل شوارع مصر
الثورة مستمرة
كفاياك بقي يا مرسي
ولا خايف من مرشدك و جماعتك
و مش خايف من ربنا لما يسألك عن كل فرد من الشعب فى ظل حكمك
ارحل يا مرسي بكرامتك او اللي باقى من كرامتك يا عبد المرشد