إنتخبنى .. شكراً !

إنتخبنى .. شكراً !
■ " شوف كام واحد مات فى محمد محمود ؟ كام واحد مات فى ماسبيرو؟..كام واحد مات فى ...؟؟ " .. جت على الكام واحد اللى ماتوا فى موقعة الجمل بقى ! ، أنا رشحت نفسى مخصوص علشان أخلص على الناجيين من تلك الموقعة ، خلينا نخلص من مطالبتهم بتاعت الحقوق كل شوية .
■ "بوستراتى" و "بانراتى" هتملى الدنيا ، لازم الناخب ميشوفش غير صورى و إسمى ، الانتخابات دى أصلها دعاية .. تعرف تعمل دعاية تكسب .. متعرفش تخسر .. مش تقولى برامج و خبرة وإنجازات ! ، والمسألة ليست مسألة جنسية أمريكية أو حتى إسرائيلية .. المهم الدعاية !
■ مصر لازم تعود إلى السرب العربى والعمل العربى المشترك و القومية العربية و البيت العربى والكيان العربى والروح العربية ، يجب تفعيل العلاقات العربية من أجل إنجازات عربية وتحقيق مكاسب عربية و.. عربية و ... عربى ! ، يا سيدى عارف إنها "مصر" مش " الجامعة العربية" .. بس شوية كدا على ما لسانى ياخد على (مصرى ، مصرية ، مصر) ..بدل (عربى،عربية،عرب ..) .
■ أنا فكرت .. وإعتذرت ، وفكرت تانى و إعتذرت تانى .. أنا بفكر إنى أفكر تالت .. بس مش عارف إذا كان هيبقى لسه فاضل وقت إنى أعتذر لتالت مرة ولا أيه ؟! ، عموما دا شغل تكتيكات مخابراتى ، مش أى شغل يعنى !
■ فى حالة نجاحى سأجعل من كفر الشيخ .. "شرم شيخ" لكل المصريين البسطاء ، وستكون شواطئ جمصة هى "ريفييرا " البسطاء ! ، أنا واحد منكم .
■ إختاروا واحد تانى ، طيب ما كنت أنا أولى منه ، هوا يعنى إبن الجماعة و أنا إبن عمى ؟!
■ الحكاية دى عاوزة واحد "شاطر" و فهلوى ، مش كل من عرف يقول كلمتين و يطلع فى كام برنامج يبقى ريس ، شبهونى ب : يوسف هذا الزمان ، لكن يا ترى يقصدوا يوسف مين فيهم ؟ .. "يوسف والى" ولا "يوسف بطرس غالى" ؟!
■ يا ولاد الأيه .. عاملين انتخابات من غيرى ! ، أنا الحق عليا إنى عرفت البلد الانتخابات الرئاسية ، إجمع لى يا "زكريا" تلاتين ألف توكيل خلينى أنزلهم و أخدها منهم بنسبة 99.5 % كالعادة ، المرشحين دول هيجيبوا لى المرض .
بقلم / أحمد مصطفى الغر