رسالة من القاهرة

ازيك يامايه ...
عاملة ايه ..وحشاني
وحشني اخواتي التنين ..
بهانة وحسين ..
والجاموسة عامله ايه ..
ياتري بتاكل زين ..
وحشاني اللمة علي الطبلية ..
ابقي اتوصي بحسين ..
واديلو نايبي ..
ده بيحب اللحمة القزين ..
وحشتني العلاوة والنملية ..
وكمان الزير ..ده بيقولو عليه هنا كولدير
ميته ساقعة وطعمها زين ..
وحشتني لمتنا واحنا بندفا علي نار القروانة ..
وتحكيلنا علي الغولة والجنية ام راسين ..
نفسي في كباية شاي علي نار الكعروب..
ده هنا قال عاملينو بفتلة ..
يظبط الدماغ يادوب...
انا الحمد لله وصلت من اسبوعين ..
وشغلوني صحفي في مجلة اسمها مخالف..
وادوني ياماية مية جنيه في اول يومين ..
اشتريت موبايل بكامرتين ..
وركبت المترو وصليت في الحسين ..
ونزلت رمسيس واشتريت جزمة وشرابين ..
وللبت بهانة عروسة بتشتغل بحجرين ..
وحصل معايا هناك فصل بايخ ..
قابلتني واحدة وقالتلي ..انا تايهة
روحت ادتلها جنهين ..
اتاريها كدابة بنت الايه ..
يلا كله لوجه الكريم ..
مش ياما خلصو القرقوشات ..
ونزلت اشتري من الدكان اللي تحتينا ..
اتاريه اسمه بوكسمات ..
قولي لابويا ميروحش للعمده ..
عشان يشوفلي شغلانة ..
خلاص ده هنا بيقولولي يابيه ..
البنات ياما هنا حلوة ..
غير اللي بنشفهم في البلد ..
اللي لابسة اخضر واللي حاطة في وشها احمر ..
ولابسين باروكات ..
الباروكة ياما شعر حمار علي شعر حصان ..
واشكال والوان ..
وانتي عاوزة تجوزيني حلاوتهم ..
اللي عاملة زي الكلب الجربان ..
ادعيلي ربنا يكرمني ..
واطلعك عمرة الحرمين ..
نسيت ما اقولك ..
مش قابلت الواد محروس ..
واد بخيتة وعوضين ..
ده بقي امين شرطة كد الدنيا ..
ومعلق علي كتفه شريطين ..
اول ماشافني ولي وشوا...
انا مش زعلان منه ..
انه طلع بوشين ..
حابعتلك فلوس ..
تشتري طراق للجحش ..
ده بيشيل بدل الحمل حملين ..
يلا مطولش عليكي ..
سلميلي علي ابويا واخواتي ..
كل سنة وانتي وكل الامهات طيبين ...