جدلية

سمير الهواري
ساعات الشمس بتقولي صباح الخير
ساعات تانيه مبتقولّيش
وبيني وبينكو بضّايق
وبتلكك عشانها واعيش
أنا ابن الشمس اللي بتنور على الفقرا
تعلمني صنوف العشق
تعلمني كمان أقرا
وبيني وبيها جدلية
سؤال ليها
جواب ليّا
تنور لي الطريق أمشي
ومركنشي
في قعدات غنا وتحشيش
وموالي على جدودي
ينسيني طريق بكره
أنا والشمس ملناش حد
وبيني وبينها جزر ومد
لا بزعل منها ف صدودي
ولا غابت ف حقي لحد
ولما بترضى تحضني
تأنجني على الكورنيش
ولما بتشتكي مني
تذنبني ف طابور العيش .