مجرد سؤال بسيط : هو ليه الواحدة مننا مطلوب منها وضع المكياج لزوجها ؟ وعدم التواجد معه إلا عبر ريح طيبة وعطور فواحة ؟ وميك أب على أعلى مستوى ثم وعند التوجه للسرير يجب أن تضع كل ماهو شفاف ومثير. ومش بس كده ؟ مطلوب أن أكون دائما مبتسمه . وبشوشه لايظهر منى سوى الطيب بالنسبة له مش مشكلة اللى حاسه بيه مش قضية اللى تعبنى الأولاد وتعبهم مشاكل البيت وإرهاقه تجهيز الأكل وترتيب البيت كل ده طظ مش قضية المهم أنى أكون مبتسمة لما يوصل أكون لابسه الحتة اللى على الحبل يكون شعرى على أفضل تسريحة تكون شفايفى على أطعم طريقة إياكى والعبس فى وجهه أوتضايقيه إياك تقابليه بملابس المطبخ لازم تكون كل حاجة على أكمل وجه طيب ماشى هعمل كل ده بس ياترى هو كمان مستعد يعمل ده ؟ مستعد يحسسنى بأنوثتى ؟ مستعد يكون حالق دقنه على طول لابس ملابس شيك وجميله واضع العطر والإبتسامة على الوجه عامل نفس اللى أنا عاملاه أواللى بينطلب منى ؟ واللى بينطلب منى كتير من أمى ومن كل الزوجات صديقاتى ومن عيلتى ومن أبى وأختى ؟ وكل المجتمع اللى بيطلب من الواحدة مننا أنها تكون على " سنجة عشرة " ؟ يعنى إيه سنجة عشرة مش عارفة والله لحد دلوقتى . بس هما دائما بيقولوا كده لازم الواحدة تكون على سنجة عشرة . اللى فهمته إنها تكون بنفس المواصفات السابق ذكرها حاضر يا أمى حاضر يابا الحاج ؟ حاضر ياخنساء كل ده والله هعمله مفيش مشكلة ومعنديش مانع بس الله يخليكم وأنا كمان ماليش إحساس ؟ طيب ليه مايكونش زوجى مثير فى الفراش آسفه بس لازم نناقش الموضوع بوضوح وصراحة ليه مايكونش زى ما أنا بكون وبحاول أنى أكون ؟ ليه مايكونش هو كمان على سنجة عشرة ؟ ليه مايشوفش مطالبى فى فراش الزوجية ؟ ليس مايعملشى كل اللى بينطلب منى ؟ هوأنا مش بنى آدمه لامؤاخذة أنا كمان ؟ ياريت نواجه مشاكلنا وقضايا الغرف المغلقة بمنتهى الوضوح وعدم اللف والدوران ياريت ؟؟ هكون متشكرة لو حد ناقشنى بصراحة . بس من غير وقاحة .