لازم نفركش!

-والله العظيم..انا شايفاك بتغمزلها !!
=يبنتي اغمز لمين بس... يعني يبقي معايا قمر زيك وابص بره..انا مش شايف غيرك يا حياتي
-قمر ايه وبتاع ايه بقي.... والله غمزتلها ومنزلتش عينك من عليها ومتنحلها كمان
=هي مين دي!!! الكافيه مليان بنات !! قصدك مين؟! البنت اللي لابسه الجيبه التركواز...ولا اللي لابسه البنطلون الفيزون الاصفر...ولا اللي لابسه العبايه الخليجي...ولا البنت اللي مطلعه القصه من الطرحه...ولا فيرجينيا اللي عامله بومبيه كبير في رأسها من ورا دي
-ماشاء الله وكمان مركز لابسين ايه وعاملين ايه...ده انت حافظهم كلهم..انت فعلا إنسان زباله...ومعندكش دم...وحقير وانا غلطانه اني عرفت بني ادم زيك
=زباله وحقير !!!!!! تصدقي انتي متربتيش...يا بيئه يا واطيه يا شمال
** بتدلق الشيري كولا في وشه..وبتشتمه
ّّ بيديها بالقلم... وبيسبلها
** بتجري وتسيب الكافيه وتوقف تاكسي وتروح
ّّبيخرج وراها.... بيركب اتوبيس 93 مظلات
تاني يوم الصبح
-بس انت بصيت عليها وغمزتلها
=ايوه بصيت وغمزتلها
-طب كدبت ليه ؟
= مش عارف...بس اتوترت
-ممكن متكدبش تاني ؟!
= حاضر
-وبعدين هي يعني احلي مني عشان تبصلها !!
=............................
-ساكت ليه ؟!
= مش قولتيلي متكدبش تاني !