لقاء مع المثاليه

شوفتها جذبنى سحرها
فرجليا طارت لوحدها
تروح و تقعد جنبها
وحسيت بارهاق حسها
وعرفت غارقها فى همها
كانى نقلت دمها
فسالت نفسى عنها
فنفسى قالت قرب منها
يمكن تحكيلك وقتها
سرها وتفتح قلبها
واتجرات وروحت سالتها
فبصت بصه كرهتها
والدمعه هربت منها
ودعيت للرحيم ربها
يساعدنى فى بناء فرحها
ومديت ايدى بمنديل
وقولتلها اسف اذا كنت تقيل
فردت بحزن و بصوت عليل
كلكم عندى زى قابيل
نفسى مره الاقى هابيل
طيب ومعندوش غليل
نبته نبت اصيل
ويبقى سعيد وانا جنبه
مش بعد الجواز ابقى همه
وافضل طول عمرى سعده
متحولش لعذابه و سمه
ويكون بيكره الخيانه
ويعاملنى زى الامانه
وعمره ما يخلينى غضبانه
ومنيمنيش وانا زعلانه
وان زعلت يصالحنى برزانه
ويستحملنى و انا تعبانه
ويفضل يعاملنى كانسانه
ويكون راجل صادق الوعد
فى الحق صوته زى الرعد
وعمره ما يبقى جبان
ولا يسمح فى يوم يتهان
وراجل دايما يهمه حالى
ويعتبر ان ماله مالى
من الاخر راجل مثالى
وسالت انت مستعد
تقف و تسد
ولا واخدها تسالى
فسرحت دقيقه بخيالى
وقولتلها سبينى افكر لحالى
ومشيت فنفسى صرخت بالعالى
يا غبى
بقى فيه والنبى
حد يسيب قمر اليلالى
فرديت يانفسى الاحسن تنسانى
بدل لما اوعدها واصبح قابيل تانى
ساعتها حفقدها و حفقد كيانى
وحتكره كل الرجال وحتزيد احزانى
ويارب حقق لها كل الامانى
ودعيت يارب ارزقنى بقمر جميل
يكون محتاج نصف هابيل
او اجعلنى راجل مالوش مثيل
امين يا ملك يا جليل
كامل محمد حامد