ابنى استشهد فى التحرير

ابني استشهد في التحرير......... علشان مصر بلاد الخير
قاللي ح اروح استشهد يا يابا ........علشان محتاجة لتغيير
ابني اتعذب قبل الثورة .................. قبل ما يستشهد بكتير
شاف الغلب وشاف الفقر.......... وشاف بعنيه معني التزوير
شاف جبروت السلطه بعينه ............من مخبر....مارا بوزير
شاف إفساد الحزب الوطني .......لا مش وطني ده واطي حقير
شاف تعذيب من أمن الدولة .......عاوز الشرفا يكونوا طراطير
شاف ملاين مصر بتتهرب ..............والشاطر..يشحن ويطير
قال يا اخونا ديه مصر بلدنا ...........محتاجة لإحساس وضمير
خرجوا شباب مصر الحرية ............ سكنوا في ميدان التحرير
قالوا..يسقط حسني مبارك ................ووزارة حزب المواخير
ضربوهم برصاص مطاطي.................. وقنابل وجمال وحمير
سقط الشهدا ف كل مدينة................ ودماهم ع الارض تسيل
صبغه مصر بلون العزة ....................حتي الميه ف نهر النيل
كات هتافاتهم دايما واحدة..................... والقرآن ويا الانجيل
يسقط يسقط حسني مبارك ..................يسقط بسقط كل عميل
ثار الشعب وخطي الصعب.................. ونهاره موصول بالليل
والجيش كان حامي لأولاده .........ماهو جيش اكتوبر يا جميل
مصر اتولدت تاني يا مصري............ وارفع راسك ده أنت أصيل
بكره أكيد احلي من امبارح ..................بأديكم ......ح نرد جميل
وح ترجع مصر اللي عارفها .......................أم الدنيا وهبة النيل
د هانى بخارى
استشارى جراحة عامة
شاعر أطباء الإسكندرية