الدين وَحدُه مش مِقياس

مهندس عزمي إبراهيم
الدين وَحدُه مش مِقياس
مهندس عزمي إبراهيم
الدين وَحدُه مش مِقياس
مش مِقياس لثقافة الناس
ولا حتى لإيمان الناس
الدين... بيعَلِّم الأخلاق
والأخلاق... هِيَّا المِقياس
ياما ناس هايجة بإسم الدين
بلسانهم.. وبالسكاكين
وبيقطَّعوا لحوم الناس
***
ابني كنايس وابني جوامع
واملا بيهم مُدُن وشوارع
واملا الدنيا خُطب دينية
لو مش بتعلِّم الأخلاق
ولا بتعَلِّم إنسانية
قبل صيام وقبل صلاه
ما يبقاش فيها مكان لله
***
لو أتهَوِّد أو أتنَصَّر
أو أتأسْلِم
واتعمَّق في الدين واتكلِّم
وادخل في الأديان في سِباق
وانا مافيش عندى أخلاق
يبقى إيماني نِفاق ورياء
***
مَثَلْ.. الناس الحُكَما قالوه
عمري ما يوم أبداً أنساه
اللي مالوش خير في أخوه
إزاي حيكون له خير في الله
******
مهندس عزمي إبراهيم