فتوى بناء الكنائس والأمن القومي

مهندس عزمي إبراهيم

عندي سؤال لشيخنا الطّيِّب إيه معناها تطَلَّع فتوَى؟
لا هي بتريَّح ولا بتطّيِّب ولا لها معنى ولا لها دعوَى!
"للأقباط أن تبني كنايس ، بما لا يضر الأمن القومي"
***
إيه معناها تطلَّع فتوَى؟ عشان القبطي يبني كنيستُه
هل من منصب سُلطة أخدته أو توب ديني أنتَ لبستُه
شعورك إيه يا فضيلة الشيخ مِن غير تريَقة أو تأليس
لو قلنا المُسلم لبناء جامع يلزمُه فتوَى من قسّيس
***
والا فضيلتك قلت الفتوَى علشان تثبت إنَّكوا أقوَى
قوللي يا شيخ أقوى من مين دا تمييز مايجيش من دين
دا بصراحة دليل الفوضى ما تصَحِّش مِن ناس عاقلين
***
إيه معناها تطلَّع فتوَى؟ علشان تِحمي الأمن القومي
هو الأمن مالوش وزارات والا الدولة بقَت بُهارات
لو "الأمر" في إيد الشيخ تبقى الدولة بقت بطيخ
***
حَلِّفتك يا فضيلة الشيخ
حَلِّفتك بما يرضي ضميرك
حَلِّفتك بالله، وبدينك الإرهاب كان قدام عينك
وانت "خَيْرُ" العارفين بيه يا شيخ "طيِّب" مين قام بيه
مين هدد الأمن القومي
كنت معانا.. شايف سامع كانوا طالعين من قلب جوامع
وكانوا بيصلُّوا صلاة الجمعة وكل الدنيا شايفة وسامعة
بعد ما سمعوا خطاب الجمعة
بقوا ثوار وولعوا نار
هاجوا وماجوا
وهتفوا وخَطفوا وسَرقوا وحَرقوا
وهَدَمو وعَدَموا وسَحلوا وقَتلوا
ودي مش مَرَّة
قول مِيت مَرَّة
قوللي بربك، قول الحق
زي الشمس "ثابت" رسمي مين "هدد" الأمن القومي
اِنتو..!!!
اِنتو "هَدَرتوا" الأمن القومي
اِنتو "اقترفتوا" جريمة العصر
اِنتو "هَدَرتوا" كرامة مصر
رَجَّعتم عَصر الفسطاط!!
مش الأقباط!!
***
يا شيخ "طيِِّب"
كل بلاد العالم أجمع
فيها كنايس.. فيها جوامع فيها معابد.. فيها مجامع
فيها رموز كل الأديان فيها مِلَل أشكال والوان
من كل مكان
وما فيش دين يستقبل فتوَى، مِن دين تاني
وما فيش دين يقدر يستقوَى، على دين تاني
وما فيش دين يمنح أو يمنع، عن دين تاني
وما فيش دين له أيَّة سلطة، فوق دين تاني
***
يا شيخ "طيِِّب"
عصر الغَزو وَلَّى وراح وحكم الدين خلاص انزاح
سيب الناس تِهدا وترتاح يمكن مصر ينولها فلاح
وأولادها توفيق ونجاح
رَح أقولها.. وبكل كياسة ما تِعجِنش الدين بسياسة
أمر "الأمن" بالقوانين والقوانين مش أمر الدين
فسيب الحكم وإنجازه
وسيب العيش لخبازه
*****
مهندس عزمي إبراهيم