جرب مرة تخش القبر

جرب مرة تخش القبر بين العتمة وبين الدود
جرب مرة ممكن تعقل ولا تاني للظلم تعود
جرب قبل ما ييجي اليوم وامام المولي تكون منكود
جرب مرة تخش بخاطرك من غير ما تقول انا مسنود
سندك عملك عملك املك لو احسنت تكون مسعود
جرب مرة بدون اكفان بكرة تكون في كفن مشدود
ولا حسنة في النعش معاك ولا حراس وعسس وجنود
خلف النعش وراك مظاليم تهتف اياك تاني تعود
ممكن جوة القصر رصاصة مهما تبني جدر وسدود
او في البحر في مركب غرقي وحرقة قلب وايام سود
او هتكون في سفاري يا صاحبي او في الغابة في بطن اسود
ياما زرعت الحقد ما بينا كلنا حاسد او محسود
جرب يخرب عقل جنابك فاكر ان الدنيا خلود
وانك نوح في زمانك معجز بكرة تغور والعدل يسود
لو دامت ما كانت وصلت لك دة الدايم هو المعبود
شعبك طيب رجوعة قريب دايما راضي بالموجود
ياللي جعلت شعوبك مسخة عاوزة تفر لاقصي حد
وتقول ارضي وارض جدودي تكية لأبني وورث جدود
ارحم نفسك وارحم شعبك كن كالماء طاهر شفاف
تمشي في وسط الناس تدعي لك نبض قلوبها عليك بيخاف
مش تتمني الموت لجنابك او تسقي الابعد سم زعاف
سيك من حواشيك الفاسدة
وابعد عن كل الاجلاف
حزب الشعب دة هو نصيرك وابعد عن كل الاحلاف
جرب مرة تخش القبر بين العتمة وبين الدود
جرب مرة ممكن تعقل ولا تاني للظلم تعود