رسالة من تحت المخدة

رسالة من تحت المخدة
الى كل ام وكل اب ..
اقسم بالله العظيم ....بحبكم
اقسمت مرة واتنين وعشرة
اقسمت امبارح ..
اقسمت النهاردة
اقسمت لبكرة
وصرخت وقلت الحقونى
ليه عنكم بتبعدونى ...
ليه دايما مش بتشوفونى
ليه مصرين تتجاهلونى
ليه مش سايبين
حضنى لحضنكم يقرب
ليه كل مرة الاقيك معاها
دايما بتهرب ..
وبترجع تانى وتستعجب
والاعجب لما بتستغرب
لما ابعد عنك .. او اسيبك
لما كلمة بحبك
ماقلهاش ليك واقولها لغيرك
طب اقولها ولا مقولهاش
اقولها ازاى وانا مسمعتهاش !!!
صعب انى اوصف كلمة ...
من جوه قلبى محستهاش
لا حسيتها ...لا حبيتها ...
لكن حقيقى معشتهاش
طب اقولها ولا مقولهاش
نفسى اقولها بعلو صوتى
نفسى ايديهم تقتل سكوتى
نفسى انادى ...لا مش هنادى
محدش هيرد قصادى
ياما اتكلمت وبقى وجعنى
تفتكروا حد هيسمعنى....
ردى عليا يا امى ...
خلى ايدكى تمسح دمعى
صدقيينى همك هوه نفسه همى
كتر خيرك ربيتينى
اكلتينى ...شربيتينى ...نيمتينى ..
سهرتى جنبى وريحيتينى
طب كنتى يا أمى سمعتينى ...
كلمة بحبك
تعالى فى مرة واعترفيلى
اعترفى لابنك...اعترفى لبنتك
قوليلى بحبك.. بحبك.. بحبك
كلمة مش هتكلفك كتير
كلمة قصادها مافيش بديل
كلمة تمنها غالى وتقيل ...
عارفه انك بتحبينى
عارفه ان بروحك تفدينى ...
بس ليه ..مجتيش فى مرة وقولتيلى
طب كنتى يا امى سمعتينى ...
كنتى بحبك حسستينى
ولما تلاقيينى بعدت
قربينى ...وخدينى فى حضنك ضمينى
ولما اسالك .. جاوبينى ...صارحيينى
متسبينيش ...وترجعى تلوميينى ...
ترجعى تقولى بدلتينى ..
.مانتى بايديكى اللى سبتينى ... وضيعتينى
ورفضتى حتى تسمعيينى ...
بتقولى انى قلبك وننى عينيكى
نفسى لما احتاجك جنبى الاقيكى
نفسى احس انك زى مابتقولى
غالية عليكى ...
نفسى زيادة جرحى
متكونش بإيديكى
بتشوفى سلبياتى وتكبيرها
وبتحسبى غلطاتى وتزوديها
وسلبياتى ..
حاطة الميكرسكوب عليها
لكن ايجابياتى
مش بتشوفيها
وكل مااحاول اكبرهاواسقيها
تدوسى عليها ..
وقبل ماتكبر تموتيها
وتشتكى منى ..
يقولولك ..
اخلصى منها وجوزيها
طيب قوليلى
بحبك ....
علشان اقولها ...
علشان اتعلمها ..
هنقول انك قلتيها ....
تعالى معايا واحسبيها
ليه عاملاها قضية ...
يا تكسبيها ...ياتخسريها
طيب حتى جربيها ...
ولما تقوليها هتسمعيها
صدقتى انك هتكسبيها
هتقوليها ....
قلتى انك بتحبينى ..
بكلمة منك غيرتينى
كلمة بسببهاعيشتينى
كلمة من غيرها ...
كنتى بايدك بتموتينى
بس خلاص صدقيينى...
زمن السكوت مات وانتهى
زمن انقضى ..
زمن اختنق ..
زمن اتقتل ..
من ايد بريئة ..كانت سايلة فى دمها
وآن الاوان..
يتولد زمن الكلام..
يتبنى والنور يبان
هرجع تانى ..
واسال نفسى نفس السؤال
اقولها ولا مقلهاش؟؟؟
هقولها ...لانى سمعتها
عرفت معناها وعيشتها
ياما نفسى قالتلى وكدبتها
دلوقتى عرفت وصدقتها
يا كل ام وكل اب ....
رسالتى ليكم من جوه القلب
مش هزار... ده كلام بجد
ولادكم اللى انتوا بتحبوهم
من غير ماتحسوا بتقتلوهم
جربوا مرة واسمعوهم
جربوا مرة تفهموهم
ومن جوه قلبوكوا طمنوهم
لما تشفوهم...
كلموهم... قربوا منهم واحضونهم ...
وعلو صوتكوا وسمعوهم
قولوا انكم بتحبوهم ...
جنب منكوا هتلاقوهم
علشان ييجى بكرة وتشوفوهم
بيفتخروا بيكوا فى كل مكان
بيقولوا هما اللى علمونا زمان
معنى الحب باللسان
معنى الاحساس
معنى الامان
وبيهم نشرنا الحب فى كل مكان
ياكل ام وكل اب ...
لو الفخر مش ليكم هيكون لغيركم
وصلت رسالتى وده اختياركم
وصلتها ...
لانى واحدة من ابناءكم
واحدة املها هوه املكم ...
واحدة قريب هتكون منكم
هتكون ام ... وليها ولاد ...
وطلبها من رب العباد ..
ولادها سؤالهم يكونوله جواب
يقولوها ولا ميقولوهاش
هيقولها لانهم سمعوها
عرفوا معنها وعاشوها
قربوا منها وحسوها
سمعوها ..
وقالوها ..
وجربوها ..
ورسالتى ليهم هتكون الحب ...
نفسى لسؤالهم يكون الرد ...
يقولها ولا ميقولهاش
ياماما وبابا متسالهوش
النص التانى احنا اصلا مشفناهوش
هنقولها بعلو صوتنا ..
هنعيش من القلب حياتنا
ورسالتنا ...
مابين بعضينا محبتنا
هنعيش بيها وهنموت عليها ..
وهنوصلها لكل لاولادنا
بنحبكم بنحبكم بنحبكم
انتوا يا اباءنا وامهاتنا