كيف تصبح مقدم براج رياضية بدون معلم ؟

البرامج الرياضية جرح غائر في جسد الإعلام المصري ، و دمل متقيح و يضج بالعطن ، و البرامج الرياضية لا تحتاج لكبير عناء حتى تقدمها و هي تعتمد علي بعض المواصفات ، إذا توفرت فيك فستصبح عبقري الإعلام ، وربما مسئولا عن قناة رياضية يمولها أحد المنتفعين :
1 – مش مهم شهادتك إيه مهم انك إعلامي ولازم تكرر ده لحد ما الناس تحفظ .
2 – فهلوي و ابن حنت .
3 – كاست قوي يقدر يغطي علي جهلك بتقارير أكثر غباء
4 – الإثارة الإثارة فهي التي ستجذب إليك الجمهور
5 – لازم تحفظ الاكليشهات إياها
( انا لا مع حد ولا ضد حد )
(احنا هنا محايدين لا يهمنا احمر ولا اصفر و لا ابيض)
( احنا بنقول حق ربنا )
( احنا لينا مصداقية مع الجمهور مش زي الناس اياهم )
( هنكشف الحقايق واللي يزعل مننا يزعل )
( هنفجر قضايا (تافهة) )
( الملايين بتشوفنا في مصر و العالم ( يعني سايبين شغلهم و متفرغين للي هنقوله) )
( احنا لا عندنا غرض ولامرض لأن الغرض مرض و اسألوا حبيبنا المشاهدين )
6 – طبعا متنساش تربط مع المتصلين واوعي حد يدخل من المعارضين ليكشفوا غباوتك
7 – لو عندك مخرج ملحلح خليه يشتري ذمة شوية مشجعين و يديهم لوحة عليها اسم برنامجك واسمك طبعا و يهتفوا ليك عشان صاحب القناة يرضي عنك وابقي ظبطهم .
8 – قناتك محرمة علي غيرك اوعي تسمح لحد ينجح غيرك لصاحب القناة يطردك و ابقي ادي اسافين أول بأول
9 – شرشح و افرش الملاية لأي حد يقول رأي معارض ليك من مذيعين البرامج الرياضية التانية
10 – خلي ليك بطانة من الصحفيين في الإعداد و الضيوف يتكلموا عنك وعن قيمتك الضئيلة و ينفخوا فيك ، مقابل استضافتهم واهو شيلني واشيلك .
11 – متركزش مع نادي واحد و خليك فهلوي اضرب اسفي هنا و اسفين هناك (فتح مخك)
12 – شد الجمهور من خلال الخبار المفبركة ، وسلملي علي المصداقية !