ح تعمل فيها أحمد رمزى ؟!

فاكرين الفنان أحمد رمزي لما كان بيظهر فى كل أفلامه وهو لابس قميص ضيق وفاتح أول زرارين ومبين عضلاته صدره، و الشاب اللي بيلبس بالطريقة دي كان بيتقال له ايه .. يا عم أنت عامل فيها أحمد رمزي
الموضة دي راجعة تاني مع صيف 2010، وده اللي كان ظاهر في كل عروض الأزياء العالمية في أوروبا وأمريكا، ولاحظناه بوضوح في عرض "فاشون ويك" اللي اتنظم في نيويورك من يومين ، وهو يؤكد إن الموضة دي هي اللي ح تكون منتشرة في صيف 2010 ..
وتعتبر هذه النوعية من الملابس المفتوحة من الصدر مكافأة للرجال أصحاب الأجسام الرياضى، فقد علقت جريدة "وول ستريت جورنال" الأمريكية المتخصصة فى موضوعات البيزنس ومتابعة أنشطة رجال الأعمال عن الموضة على أن تصميم الملابس المفتوحة من عند الصدر اتعملت لتكافئ الرجال الحريصين على ممارسة الرياضية لإظهار عضلاتهم، ونصحت الصحيفة الرجال والشباب الكسالى الذين لا يمارسون الرياضة أن يهتموا بها وينقصوا وزنهم والحفاظ على جسم رياضي متناسق حتى يستطيعوا مجاراة الموضة دي.
وتاريخ موضة القميص المفتوح يعود للعشرينيات من القرن الماضى، وتحديدا في مدينة هوليوود وأول واحد عملها هو الممثل الأمريكى " دوجلاس فايبانكس" لما ظهر بيه في فيلم " لص بغداد" وهو لابس قميص مفتوح منه أول 3 أزار ، وبعد كده انتشرت الموضة وقتها في كل أنحاء أوروبا وأمريكا ما عدا مصر لاعتبارات اجتماعية وقتها أنه فلا يصح أن يمشى الرجل وصدره مفتوحاً .
وبعدين ظهر دوجلاس بنفس القميص المفتوح في فيلم " القناع الحديدي" ليلبسه كل شباب أوروبا وأمريكا وقتها ويبدأ بعدها كل الممثلين الأمريكان في لبسه، لحد ما ظهر الفنان أحمد رمزي في أواخر الخمسينيات في أفلامه وهو لابس القميص المفتوح ليظهر عضلات صدره.. ويبدأ معظم شباب مصر وقتها في تقليد رمزي، ومن غير ما يحس كان سبب في إدخال الموضة دي لمصر.
ويعلق الفنان أحمد رمزي على موضة القميص المفتوح قائلا: أمي كانت إنجليزية وكنت أسافر كثيراً من صغرى لإنجلترا، وبعدما أصبحت فناناً وكنت أسافر لأوربا كثيراً كنت أحب أشوف الممثلين الأجانب في ملابسهم وأخذت منهم أحدث خطوط الموضة ، ووجدت إن كل الممثلين في أواخر الخمسينيات بيلبسوا القميص ويفتحوا نصه فعجبني الشكل ده وبدأت أعمل زيهم .. ووقتها كنت شاباً وأمارس رياضة وولد شقي ودنجوان، فكنت أحب أظهر عضلاتي، وأنا فرحان طبعا لما بينسبوا الموضة دي لي في مصر لأني أول واحد عملت كده هنا، وسعيد جدا إن الموضة دي رجعت تاني.
أما عن رأى مصمم الأزياء هاني البحيري.. فيرى ان موضة فتح أول زرارين من القميص هي فعلا موضة قديمة ترجع للخمسينيات والستينيات من القرن الماضى، وبدأت فعلا تعود الأيام دي مع بداية صيف 2010 خاصة بعد عروض الأزياء اللي أقيمت في أوروبا وأمريكا وظهر فيها أكثر من موديلز وهو لابس القميص الضيق وفاتح نصه لحد صدره، ولكن مش كل الأزياء تليق على كل الناس، فاللي عايز يلبس قميص ضيق ويفتح نصه لازم يكون لجسمه مواصفات معينة يعنى مش هاينفع يكون عنده (كرش) فلازم يكون جسمه رياضي،و عنده عضلات وعريض الصدر .