المانيكان " لامؤاخذة " عريانة !

كل يومين نطلع بافتكاسة جديدة نحرم الحلال ونحلل الحرام يعنى تطلع لنا فتوى تبيح شرب السجاير وإحنا صايمين فى حين تظهر اخرى تحرم الفرجة على ماتش كورة ... ولو افتكاساتنا خلصت نستورد من الخارج ..فمن كام يوم كدة أتحفتنا إيران بفتوى غريبة وهى كالاتى
" لابد من حجاب المانيكان في محلات الملابس " حيث يعتبرون تعريتها من مقدمات الزنا رغم أنها مجرد تماثيل .. وطالبوا بالتشديد على "حشمتها" ومعاقبة المحلات المخالفة بالغلق أو الغرامة والأغرب من كدة أن هذه الفتوى لاقت ترحيبأً من بعض شيوخ الفضائيات مؤكدين على تأثيراتها الضارة بإثارة الغرائز، مما يدعو إلى ضرورة إصدار فتوى مماثلة تطبق على المحلات والمتاجر المصرية .
واول حاجة جت فى بالى طبعا ان اشجب واعترض بحجة أن الموضوع فيه " ايران " يا جدعان ، لكن بدون ارادة وجدت نفسى بقول ايه الفراغ اللى عايشين فيه ده؟ خلاص حلينا مشاكل التعليم والتحرش فى الشوارع والجهل فى العقول والانحراف فى الميادين والدموية فى الأفلام والهيافة فى المسلسلات والانحدار فى المسرح واكتشفنا أن المشكلة فى المانيكان ، كل ده لحد ما صوت من بعيد نادانى وقال لي بلاش نظرية القطيع اللى انتى ماشية وراها دى .. فكرت شوية ييجى 3 ساعات كده لغاية ما جالى صداع فى الاخر وقررت انزل موقع الجريمة .. وفعلا نزلت الشارع اصوب واجوب بين الطرقات وعينكم ما تشوف الا النور, والله عمار يا مصر .. فاتريناتك غطت كل الاذواق ، مانكيانات محجبات ومنقبات ولامؤاخذة .. عريانين , يعنى بصراحة وبكل موضوعية- كما درسنا فى ميثاق الشرف الصحفى- فيه محلات بتستهبل ولو كان الجماعة بتوع الفتوي شافوها كانوا هيقولوا فتوى تانية بجلد اى تمثال أنثى تم ضبطه مع تمثال رجل فى فاترينة واحدة .
المهم .. وانا ماشية فى امان الله لقيت بنت وصديقاتها امام المحلات اياها شغالين همس وضحك .. وحاولت اعرف رأيهم إيه فى البداية واعترفوا انهم فعلا بيتكسفوا لما بيشوفوا منظر المانيكان وهو عريان .. لكن بعد ما قلت لهم على حكاية الفتوى اياها لقتهم اعترضوا وشجبوا وقالوا " بالمرة يصدروا قرار بنقاب حتشبسوت و توحور وإيزيس وافروديت وعزل علماء الآثار الذين يلمسوا هذه التماثيل إلى خارج حدود الكرة الأرضية " .
وفى الاخر عرفت ان الشىء الغبى اللى نادانى من شوية لم ينادى حد غيرى, وكان واضح ان الناس اول ما سمعت بالحدوتة دي قررت انها تعترض وتشجب وتتريق .. وواحد يقولك المرة دى هناخد جائزة نوبل فى الهيافة والتفاهة وواحد تانى يقولك لو عايز تتفرج على مانيكان هات معاك " محرم" ! .