كلام (3)

( الأسماء الواردة في هذا النص تشير الي أشخاص خياليين , وأي تشابه بينها وبين أسماء أشخاص في الواقع هو مجرد صدفة )
(10)
امبارح نشأت جالي
كان بقالي حوالي اتناشر سنة
ما قابلتوش
كان ماسك وردة في إيده
أقصد كان ماسك ورقة ف إيده
أقصد كان ماسك زهرية ف إيده
كان ماسك خنجر
ماسك سبحة
ماسك مدفع رشاش
كان ماسك حاجة في إيده مادققتش
كان لابس طرحة
وف وشه حسنة كبيرة
كان يشبه ستي
كان بيلعب لي حواجبه وهو بيتكلم
قلت الواد اتجنن بالتأكيد
قلع الطرحة شفت دماغه قرعة .. بطاطساية
ونزل علي ركبه وقال :
أنا عارف إني غلطت
أنا عارف إني كسرت الكباية
بس أنا مالي بالكباية
الكباية وقعت وانكسرت أنا مالي
أنا لا الأرض ولا الكباية
ولا حتي المصنع , أنا مالي
أنا عايز اتجوز عايدة إمام
عايز اخلف أطفال مجنونة
عايز اكون عرسة
في الدفا تحت العربية
عايز كفتة ولحمة ومية لفت
أنا مش باشحت منك
أنا عايز لحمة
لحمة كتير
عايزك تسامحني وتبطل تفكير
ياللا نلعب صلح
ياللا نتجوز عايدة إمام
ياللا نخلف سلوي وأميرة
ونمثل في الافلام
اسمع مني وخليك ساكت
أنا نشأت .. أنا نشأت .. أنا نشأت
أنا نشأت سعد حسين مدكور
متجوز لوللا وملة علي ملة يبقوا سرير
أرجوك تسمعني وتبطل تفكير
خليك متأكد إني باحبك
من أول ما قابلتك في الزحمة
اتناشر سنة ماقابلتكش
وكأنك عامل نفسك نجم
وكأنك واثق من نفسك جدا وانت حمار
وبسيط زي البطيخ والجزم الباتا
أنا شايفك في الزحمة بتجري
زي الافلام
من فضلك وسطن ايدك وانت بتضربني
اعميني بجد
(11)
كانت صناديق وطلع لها رجلين
نفعت طرابيزات وكراسي
ودكك وكنب
حطوا عليها طقاطيق وشلت ومساند
حطوا زهريات فيها ورد
ناموا عليها وحلموا
مارسوا الحب
احتفلوا بأعياد الميلاد
حطوا المولود في المنخل فوقها
والأبريق والشمع
لكن في الآخر دابت رجليها
فتحت أفواهها الصناديق !
(12)
رقم التليفون اتغير
صفر اتنين صفرين اتناشر زيرو اتنين صفرين
رقم التليفون اتغير بس انا ماتغيرتش
نفس الصوت ح يرد عليك
ألوه
لا والله .. انا عبده الخدام
سيدي عبدالمعطي اتجوز ست سعاد
من مدة , بقاله ست شهور
في السقف النجفة بتتهز
الظاهر هو الزلزال
عندكو برضه؟ لأ؟
الظاهر عندنا بس
سيدي عبدالمعطي اتجوز من ست سنين
من ست دقايق
العالم كله اتجوز من ست دقايق
ستي عطيات عندها ستاشر بنت
وانا عندي تلات نجفات عمالة بتتهز
لأ مش موجود
موجود السقف
السقف بيتهز
أنا خدامك عبده
سيدي مش موجود
ستي مش موجودة
ومفيش أطفال في البيت
(13)
ياسلام لو روحي بلاستيك
كنت اغسلها وأصبنها
كنت أقلعها وألبسها
واركنها جنب دماغي وأنا نايم بالليل
(14)
مش ح تبيع ولا لوحة
مش ح يزور المعرض إلا اتنين
بس الألوان لما تغرق إيدك
وتحس انك طفل بيلعب
اروع عندك من جايزة في بينالي باريس
وسخت هدومك بالألوان
فيه أسعد من كده إيه؟
ألوان الطيف في هدومك وف لحمك
مش ح تبيع ولا لوحة
طظ
مش هيزور المعرض الا اتنين
ح يكونوا زيك
أطفال .. بيحبوا الرسم .