السلفيين اتجننوا ..وأمريكا هتعملكوا أيه يا أقباط .. بجد أنا أسفة يا ريس !

هو فيه أيه؟ مين ورا إللى بيحصل؟ بجد أنا عايزة أعرف مين إللى أدى الحق لأصحاب العقول الفسفس، والجلاليب القصيرة إنهم يهاجموا كنيسة مارمينا بإمبابة علشان يحرروا عبير إللى بيقولوا إنها أسلمت واتحبست فى الكنيسة.
ولا إللى ولعوا فى كنيسة العذراء .. هى الكنايس ذنبها أيه ؟! والغريب والمضحك فى نفس الوقت إننا نلاقى 200 شاب قبطي سموا نفسهم اسم الله عليهم ''اتحاد شباب ماسبيرو القبطية'' معتصمين قدام السفارة الأمريكية لغاية ما يقابلوا الست السفيرة، اتحاد مين وماسبيرو مين وآل أيه بيطلبوا من أمريكا إنها تحميهم مما وصفوه ب''اضطهاد واعتداءات مستمرة من جانب التيارات الدينية الإسلامية''، لا والله كل ده إنتوا شايفينوا فى مصر ودلوقتى أصبحت أمريكا هى الصدر الحنون ليكم, يا حنين, هى أمريكا هتعملكوا أيه، إنتوا لسة متأثرين بابن لادن ولا أيه وعاوزينها تضربنا بالأر بى جى ؟.
وبجد عاوزة أعرف مين عبير ومين كاميليا اللي بسببهم البلد بتولع واللى ممكن ما يكونوش مسلمين أو مسيحيين أصلا، وبصراحة أنا مش فاهمة ليه عرضوا إمبارح فى عز النار حوار كاميليا اللى كانت غريبة ومريبة مع المذيع اللى لازم يكون برميل جاز مخروم حاضن صباع ديناميت وبيسلم على سيجارة والعة تحت جزمة زبال؟ عاوزين أيه بالظبط، وحتى لو أسلموا هو علشان ننقذ روحين نموت 12 روح ومصابين بالمئات! اللى حصل امبارح ده مهزلة وفوضى وقلة أدب علشان كده نفسي يستقيل الثلاثى المفتى وشيخ الازهر والبابا شنودة علشان اتهرينا بوس وأحضان والذى منه وبردوا مفيش فايدة، إذا كانت هى دى الديمقراطية اللى اتعلمناها من 25 يناير فاعذرونى أنى أقول يا ريتك يا ثورة ما قمتى وبجد أنا آسفه يا ريس، ويا ريتك يا أمن الدولة لسة بعبع ويا ريتك يا فئران كنتى مستخبية ، كل ده كان ممكن ما يحصلش لو كاميليا سرحت شعرها !

شيرين أبو شعيشع