يسرا اللوزي : الكل يحسن معاملتى .. وده يضايقنى !

يضايقها أن المنتجين احترموها في البداية لأنها عملت مع يوسف شاهين بينما يعاملون الشباب الآخرين معاملة سيئة جدا, شخصيتها قوية وعصبية في الحقيقة إلا أنها بتتكسف ولا تستطيع إظهار هذه الشخصية أمام الكاميرا, تعالوا نتكلم مع يسرا اللوزي بلا كسوف ..
قلت إن دورك في مسلسل الجماعة مختلف عن أي دور سابق لك؟؟
أيوه لان المخرج محمد ياسين زقني زقة جامدة علشان أقدر أطلع العصبية الخاصة بالشخصية القوية التي أجسدها في العمل لفتاة في العشرينيات مهمومة بما يدور حولها , فرغم أنني في الحقيقة شخصيتي قوية وعصبية , إلا أنني بتكسف ولا أستطيع إظهار ذلك أمام الكاميرا .
المسلسل دار حوله الكثير من الجدل منذ أن كان فكرة يكتبها وحيد حامد , فما الذي حمسك للمشاركة فيه؟
مبدئيا عجبني فيه اني عمري ما اشتغلت في سيناريو لوحيد حامد , كمان محمد ياسين اسمع انه مخرج شاطر جدا , فأول ما استشرت الناس قالوا لي اعمليه حتي لو الدور صغير لأنه هيكون مهم , أنا مش بختار دايما حاجات مثيرة للجدل , ولكن في النهاية الناس مابتحبش تسمع الحقيقة وعلشان كده الأعمال دي بتثير المشاكل .
##
يعني إيه الناس ما بتحبش تسمع الحقيقة؟؟
يعني مثلا فيه فيلم بيجيب مشاهد معينة واقعية وبتحصل في مصر وكلنا عارفين إنها بتحصل , فالناس تضايق وتقول الحاجات دي مش بتحصل عندنا وإزاي تظهروها في السينما , لكن من جواها بتكون متأكدة إنها بتحصل !!
ما المختلف في سيناريو وحيد حامد؟؟
السيناريو متهندس بشكل هايل , التركيبة مش سهلة لأنه بيروح من التاريخي للحديث وبيعمل صلة بين اللي حصل زمان ودلوقتي بشكل جامد جدا , لكن مشكلتي الوحيدة كانت في الحوار وهذا دايما بيحصل لما بيكتب الحوار واحد من جيل تاني , لأنه ساعات بتكون موجودة مصطلحات قديمة شوية علي جيلي , مفيش سيناريو مسكته وكاتبه واحد عمره فوق الأربعين عاما وكنت مرتاحة في كلامه , لأن فيه كلمات بيستعملها احنا ما بنستعملهاش , فبتحصل تعديلات دائما من المخرج , وده بيحصل في كل الأعمال حتي مع تامر حبيب رغم انه شاب وأصحابه شباب إلا أنه ساعات اللغة بتكون جاية من زمن تاني .
قلت إن السيناريوهات التي تعرض عليك للعمل في السينما غير جيدة !!
معظمها , لكن مثلا في كثير من الأفلام يكون عندي مشكلة في التوقيت , أنا بحب أخطط لكن المشكلة ان السينما في مصر من غير نظام ولا جدول .
الناقد سمير فريد قال إنك تؤكدين الروح الجديدة التي بعثها المستقلون في السينما , ما الذي ستغيره هذه الروح في السينما؟
أعتقد إنها هتغير اكتر في فكرة ان الفيلم لازم يكون متكلف كتير علشان يكون فيلم كويس , فكرة أن جودة الفيلم تقاس بميزانيته , هناك نوعية أفلام تحتاج لتكلفة عالية , وهناك نوعية أخري أحسن أن تصور بكاميرا ديجيتال وبشخصيات طبيعية , حسب السيناريو . كمان السينما المستقلة هتدي الفرصة لظهور جيل جديد من الممثلين , كل شوية نسمع ان مفيش وجوه جديدة , لكن الواقع إن المنتجين والممثلين هم اللي بيقفوا ضد الممثلين الجدد , بيصعبوا كل حاجة قدامهم وبيعاملوهم أسوأ معاملة , ومطلوب منهم يشتغلوا ببلاش , ويجيب هدومه علي حسابه , ده غير إنه بيتعامل معاملة سيئة .
##
ممكن ترفضي دور لأسباب أيديولوجية؟؟
أكيد طبعا , مثلا لما جالي فيلم أمريكاني كان جزء منه سيصور في اسرائيل ورغم أن شخصيتي كانت ستصور في نيويورك فقط رفضته لأني لا أريد المشاركة في فيلم سيصور في اسرائيل , وهناك افلام رفضتها في مصر ولا أريد الحديث عنها .
تحدثت عن الصعوبات التي تواجه الشباب في بداية عملهم في الفن , فما الذي قابلته من هذه الصعوبات؟؟
الحمد لله لم أقف هذا الموقف لأني بدأت بطلة مع يوسف شاهين , فعندما كان يجلس معي المنتجون كانون يتعاملون مع ممثلة بدايتها مع يوسف شاهين وفي أول أفلامها ذهبت لمهرجان كان ومشيت علي السجادة الحمراء وعندي 17 سنة , فبحكم ما حكيته لا يستطيع أحد أن يسيء معاملتي , ودي حاجة أصلا تزعل , إن علشان اشتغلت مع يوسف شاهين الناس تحترمني ولو شاب محترم عاوز يشتغل يذلوه !!