بالفيديو: هم دول الفلاحين اللى هيدوسوا علينا بالجزم !

ممكن سؤال رخم شوية فى الأول : عمرك سألت نفسك .. إنت عايش ليه ؟!
أنا فتحت جوجل ولقيت مفاجأة .. عارفين إن عبارة " عايش ليه " باللغة العربية جت سيرتها فى 5 مليون و140 الف صفحة .. تخيلوا كل دى موضوعات عن ناس مش عارفة أو بتدور أو بتألف وبتفشر على غيرها وبتقول إنها عارفة أي حاجة وخلاص ..
ومن غير فلسفة وتعقيد .. طيب تعرف إيه هدفك فى الحياة ؟! يعنى مقضيها أيام وخلاص ولا مستنى فرصة .. ولا شايف ومحدد وبتسعى وناوى توصل بس ربنا يسهل ؟! ..
طيب إيه علاقة اللي فات بحكاية " إنت عايش ليه " اللى بدأنا بيها ؟! أقولك ،
فاكرين فيلم صراع فى الوادى ؟! أرجع بالذاكرة شوية كده .. افتكر وهتفهم ان هي دي اخرتها .. الفيلم ده لو اتفرجت عليه هتلاقى نفسك بتحبه بدون سبب واضح ، كئيب وممل والتمثيل فيه " أوفر " شوية رغم العمالقة اللي فيه .. لكنه فى النهاية فيلم عبقرى بدون أسباب ، فكرة الفيلم فى رأيي يمكن اختزالها فى عبارة : بلاش " عنطزة فارغة " ومعادنا في التراب لان كل الرؤس هتتساوي هناك !! هو مش كده بالظبط .. بس على رأي فاتن حمامة وهى بتقول لزكي رستم بالفم المليان بعد ما اكتشفت انه شيخ منصر " بكرة نموت ونندفن تحت التراب والفلاحين اللي بتستعبدهم النهاردة هما نفسهم اللي هيدوسوا علينا بالجزم " .. طبعاً هو مردش عليها وساب الملاحظة دي لذكاء المشاهد وهي إن مفيش فلاح واحد طول الفيلم ظهر بجزمة ، عموماً مش ده موضوعنا ..
##
طيب إيه علاقة فاتن حمامة بحكاية " إنت عايش ليه " اللى بدأنا بيها ؟! أقولك ،
من يومين اتفرجت على فيلم صراع فى الوادى وفكرت فى عبارة فاتن حمامة للمرة الألف كالعادة .. وبعدها دخلت ع الفيس بوك واتفرجت على فيلم رسوم متحركة قصير وصامت .. وحسيت إن الدنيا بتدور حواليا ، عارف لما تتفرج على فيلم عمرك الصامت ماشي قدام عينيك ومتقدرش تغير فى تفاصيله أي شيء ؟! رحلة كده كده هتمشيها .. موضوع فيلم EL EMPLEO - كلمة اسبانية تعني العمالة - مش فلسفة لكن فكرته بسيطة وعبقرية .. ممكن تفهم بشكل مباشر إن الهدف هو احترام الجمادات اللي لو نطقت هتصرخ فيك ، وممكن تفهم إنك لازم تحترم نفسك لإن الجمادات دى لو سكتت إنت اللي هتموت ..
طيب إيه علاقة فيلم الكارتون بكلام فاتن حمامة بحكاية " إنت عايش ليه " اللى بدأنا بيها ؟! أقولك ،
مرة فكرت فى الساعة اللي بترن عشان تقولك " قوم عمرك بيجري " .. سمعتها بتتكلم قبل كده ؟ الصور المتعلقة حواليك .. ضى النور ومرايتك وناسك ، كلهم بيتكلموا ويقولوا ويحكوا كلام عنك وليك وإنت ولا دارى ، فنجان الشاي والشماعات .. التاكسي مش مجرد عربية وسواق ، والاشارات خضراء وحمراء والبوابات المتحركة كلها محطات بتسلمك ومش تحت أمرك زي ما أنت فاكر ، الاسانسير زي قطار العمر .. عايز تطلع فووووق قوي ؟! ماشي .. وفجأة من غير ما تاخد بالك تسلم عهدتك وتروح بارادتك تنام علي الارض عشان تبقي دواسة لأي حد بعدك .. يعني الله يرحمك ؟!
##
زعلت من الحقيقة ..
عارف مين هما الفلاحين اللي انت استعبدتهم في حياتك ؟!
وقتك وشبابك وصحتك ومالك .. هدومك واصحابك وأعداءك والدنيا باللي فيها ، ويمكن حاجات تانية كتير إنت وحدك اللي عارف أولها من أخرها ..
نرجع تاني لموضوعنا .. عرفت انت عايش ليه ؟!
المرة دي قول لى إنت .. اسيبك تتفرج على فيديو الفيلم وبعدها قول اللي فى نفسك ..
ملاحظة مهمة : بلاش تزعل من نهاية الفيلم لإن المخرج هو اللي شايف كده .. تمام زي رأي ست الكل فاتن حمامة زمان ..!!.
وليد فاروق محمد
##