30 سنة انتشر فيها الطغيان والفساد ، ثم قامت ثورة مازالت تزحف لتطهر كل أركان المجتمع ، لكن بين كل ذلك هناك طرف لا يفرق معهم – حتى الآن – وهم أطفال الشوارع الذين نجدهم فى كل مكان فى مصر...حاولنا الاقتراب من هذا العالم عن طريق حوارنا مع واحد من هؤلاء الأطفال..وهو عمرو أو حلّوس كما يناديه أقرانه،والذى تردد كثيرا حتى وافق على اجراء هذا الحوار.. إنت اسمك ايه؟ اسمى عمرو ، وأبويا تقريبا اسمه محمد،أصلى انا نسيت اسمه من كتر ما كل الناس بتقولى يا حلّوس ومعرفش ليه بينادونى كده،بس ده بقى اسم الشهره بتاعى. عندك كام سنه؟ تقريبا 15 سنه. طيب إنت ايه حكايتك؟ بص يا باشا،أنا فى الشارع من زمان قوى،وكل اللى فكره إنى كنت وأنا صغير بسرح مع ستى اللى قالتى إن أبويه وأمى ماتوا،وبعدين هى كمان ماتت فلقيت نفسى لوحدى فى الشارع. يعنى ايه بتسرح مع ستك؟ يعنى كانت بتلف تشحت عليا فى السيده،أصلى احنا كنا عايشين هناك قبل ما تموت. طيب إنت بتعيش فين دلوقتى؟ ياباشا ما إنت شايف أنا بعيش فى الشارع،وبنام تحت أى كوبرى أو فى محطة المترو،أو فى أى خرابه. وإنت عملت ايه بعد ما ستك ماتت؟ كنت بسرح برضه اشحت فى الشارع لحد ما اتعرفت على عيال فى الشارع وبقيت معاهم من ساعتها،واحد اسمه عبده حمؤه،وسعد رينجو،وغيرهم كتير. وانتوا بتعملوا ايه؟ ساعات بنروح للحاجة عطيات فى شبرا،وهى بتدينا حاجات بنبيعها فى الاشارات،نبيع مناديل أو فوط حمرا،وساعات كنت اروح اشتغل عند ميكانيكى فى السيده ،بس هو كان بيضربنى علشان كده سيبته،وأهو بقلب عيشى فى أى حاجه. ومين الحاجه عطيات؟ دى واحده فى شبرا بتبيع حاجات وبتسرح العيال يبيعوها وبتديهم حسنتهم بعد ما تنشف ريقهم،وبالكتير تديهم 3 جنيه. انت بتكسب كام فى اليوم؟ والله حسب الظروف ،لما يكون فيه سبوبه نظيفه ممكن أكسب 10 جنيه فى اليوم،وساعات 5 جنيه ، وساعات مفيش. والفلوس دى بتجيبها منين؟ الرزق يحب الخفيه ، يا إما من بيع المناديل أو من الشحاته. طيب بتاكل ازاى؟ أهو بروح عند أى عربية فول لو معايا فلوس،ولو معيش فلوس بروح أى محل وأشحت أكل،ولو غلبت بروح عند أى مقلب زباله أصلى الناس بترمى أكل بالهبل،وأهى بترزق. إنت بتشرب حاجه؟ أه بشرب سجاير بس والله يا باشا،وكلها سبارس يعنى سجاير مشروبه قبل كده. عمرك ما شديت كلّه؟ ساعات،بس اعرف عيال بيضربوها ليلاتى فى أى منطقه. طيب إنت وأصحابك بتناموا ازاى؟ عادى بنروح أى مكان وننام فيه الرجاله مع البنات عادى. طيب مابتخفش؟ لأ أصلى أنا بلف طول النهار فبرجع مهدود بنام على طول وبلاقى الصبح جه بسرعه. * مابيحصلش إعتداء من أى ولد على أى بنت؟ بيحصل بس بيبقى برضاهم،بس أنا معملتش حاجه والله،وساعات غصب عنهم بس برضه مابيقدروش يقولوا لأ. طيب إنت عمرك ما اعتديت على بنت؟ لأ وربنا. ## اتمسكت قبل كده من البوليس؟ لأ،أنا دايما ببقى فى السليم،وبعرف أكت وأجرى،لأنى عارف إنى لو اتمسك مش هارجع تانى،وأول ما اسمع السرينه اقول يا فكيك. إنت حاسس إن الناس مش بتحبكوا؟ الناس بتخاف مننا مع إننا غلابه قوى،وما بنضرش حد،صحيح إن فيه عيال ولاد حرام بيسرقوا ويعملوا عمايل وحشه بس فيه غلابه كتير. طيب إنت مبسوط كده؟ يعنى هو بكيفى،وبعدين يا باشا أنا اتعودت على المرمطه،وأنا مش زيك بيه. سمعت عن التوربينى؟ لأ. التوربينى ده كان زعيم عصابه لإغتصاب أولاد الشوارع..عمرك شوفت كده؟ يااه فيه كتير كده،أعرف إنه كان فيه واحد اسمه عزت كان بيعمل كده،أنا سمعت عنه،بس مليش دعوه بيه ولا عمرى شوفته. طيب شوفت قبل كده أى زعيم لعصابه من أطفال الشوارع؟ حراميه يعنى،أه شوفت قبل كده،ياسر صاحبى بيشتغل معاهم. وإنت ماشتغلتش معاهم ليه؟ أصلى بخاف أتمسك،وبعدين أنا غلبان يا باشا. طيب شوفت بنات باعوا أولادهم قبل كده؟ طبعا شوفت،وأعرف واحده اسمها عزة عملت كده وباعت ابنها،بس هى متحصره عليه دلوقتى يا ولداه،ونفسها ترجعه،بس خلاص بقى. إنت نفسك فى ايه يا عمرو؟ نفسى فى حاجات كتير،نفسى يكون عندى بيت أعيش فيه،ونفسى أبقى معلم كبير ،ويكون عندى موبايل بكاميرا،ونفسى فى أكلة كباب من عند الحاتى،وعلى فكره دى حاجه نفسنا فيها كلنا. مش نفسك تعيش حياه كويسه وتشتغل؟ إيدى على كتفك ،هو أنا يعنى هاقول لأ.
