تامر أمين : أنا مش كده !

استضافت بوابة الشباب الإلكترونية أمس الإعلامي تامر أمين في لقاء مفتوح مع قراءها، في السطور القادمة إجابات تامر على أسئلتهم كما هى وبدون أي " مونتاج " ..
تصوير: أميرة عبد المنعم
##
سارة موسى
احساسك إيه عندما تسمع الإتهامات الموجهة بالغرور؟؟
يمكن لأن الطويل لما يكون عريضاً تلاقي الناس بتقول "ليه نافخ نفسه كده" لكنه مش نافخ نفسه في الحقيقة، هو منفوخ طبيعي، ربنا مظبطه كده، مع رخامة الصوت وده رباني برضه ، كمان بعض الناس بتفهم الثقة في النفس إنها غرور.
اكثر من قارئ يقول أنك مذيع دمك ثقيل وعامل فيها لقمان الحكيم!!
لولا اختلاف الأذواق لبارت السلع وفشل المذيعون .
نجلاء أحمد
انتقد دفاعك الدائم عن النظام بمناسبة وبدون مناسبة..
عاوز أقولكم سر إن فيه كتير من الوزراء مابيحبوش يسجلوا معايا وبيقولوا "أصل تامر بيشد علينا جامد"!! وأنا ملاحظ إن فيه أسئلة كثيرة تتهمنى بأنني مع النظام .. يمكن علشان انا بتبع الاعلام الهادئ ، لكن بكل امانة أنا مش كده.
##
منير أبو الدهب
أنا مستاء جدا مما فعلته وقت مباراة مصر والجزائر..
المنتخب المصري راح عنابة في بداية التصفيات وفضل 10 الاف جزائري سهرانين طول الليل حوالين الفندق بالدفوف والصريخ علشان يفقدوا المنتخب التركيز، وأنا عارف إن في الرياضه حاجة اسمها المعاملة بالمثل، فقلت للناس روحوا عند الفندق وأعملوا زيهم ! .
لو فكرت تعمل برنامج تاني هيكون عامل ازاي؟؟
برنامج فضفضة يكون " بوقاً " للشعب المصري والطبقة المتوسطة اللي مابتلاقيش مكان تطلع فيه اللي جواها.
هل فكرت انك تعمل برنامج ثنائي مع اخوك علاء بسيوني خاصة ان فيه توافق كبير بينكما ؟
لا مفكرتش لإن شخصياتنا مختلفة تماما.
ما هي طموحاتك كإعلامي؟
إني ابقى اكثر نجاحا وقربا من الناس.
مش شايف انك كمذيع نشرة احسن من مذيع في التوك شو؟
أحاول الإجادة في أي مكان أروح ليه والمشاهد هو الحكم.
هل تعترف أنك مذيع بالواسطة؟
بصراحة كان دخولي التلفزيون بالواسطة لكن السؤال المهم: هل والدي بيطلع معايا على الشاشة كل يوم؟
لماذا الإتهامات الموجهة لك مكررة تقريبا؟
ده شيء بيبسطني، التكرار يعني انه مفيش غيرها، الناس بتتكلم اني مغرور شوية، اني مذيع بالواسطة، إني ساعات بجامل النظام، وزي ما بستمتع جدا بالمدح، لازم اقبل النقد .
##
توتا أحمد
ليه ناس كتير بتوصف التوك شو بإنها بتنجح على حساب آلام الناس من غير ما تفكر إنها ترد هذا النجاح بإنها تحل مشاكلهم؟؟
خلينا نتخيل إنه مفيش برامج توك شو، كان الفساد هينتشر أكتر وماكناش هنلاقي أى صوت يوقف هذا الفساد، وأنا معترض على قولها إننا مابنساعدش.
هاجر اسماعيل
ماذا عن الحلقة التي ندمت عليها .. وهل ترى ان خيري رمضان يهدد وجودك في البرنامج؟؟
فيه حلقة بعض الناس لامتني بعدها وهي الحلقة التي استضفت سمير زاهر رئيس اتحاد الكرة بعد نهاية الأزمة الخاصة بمباراة مصر والجزائر ، أما بالنسبة لخيري رمضان فهو منافس طبعا ..والتنافس سر النجاح بدليل إني موجود قبل خيري في البرنامج، ومعانا محمود سعد واسمه اكبر من اسم خيري رمضان.
كمال
مصر رايحة على فين .. لبر الأمان ولا بر مخيف ؟
المصريين لو فضلوا صامتين و" مالهمش فيها " مصر هتروح في حته مش كويسه، لو ابتدينا ناخد قراراتنا بنفسنا ونعترض لو قرار ماعجبناش، أعتقد ساعتها إن مصر هتتحسن كتير.
##
ما الشرط المطلوب توافره في الإعلامي الناجح وهل هو متوفر في مذيعين كثر؟؟
1. القبول وده رباني، 2. الثقافة والإطلاع والشخصية ودي حاجة ذاتيه، وهذه المواصفات موجودة في قلة قليلة من المذيعين.
مين فيهم؟؟
عمري في حياتي ما أقدر اقيم زميل لي، لما استقيل هقولك مين بيعجبني.
مين بيعجبك كسياسي؟
سؤال صعب بصراحة.
طيب مين مابيعجبكش؟؟
كلهم في الحقيقة.
فائقة بيومي
كيف أكون شخصية مثقفة خاصة اني في بداية دخولي لمرحلة مهمة وهي مرحلة الجامعة؟؟
الشخصية بتتكون من: أولا قراري الشخصي، أنا عاوز اكون إيه، وقراري الشخصي إني أشكل وارسم الشخصية اللي أحب اتعامل فيها مع الناس، رقم اثنين الخبرات اللي بيمر فيها الانسان في بيئته مع أهله، بالإضافة إلى القراءة والإطلاع، ودي مهمتها تفتيح المخ.
توتا أحمد
ما الطقوس التي تتبعها قبل الظهور على الهواء؟
بقعد في صومعتي قبل الهواء بنص ساعة ولا يدخل احد عليه وبحاول أشحن كل تركيزي وطاقاتي، فقط.
متى نشوفك في برنامج بمفردك على الفضائيات؟؟
اتعرض عليه كتير فكرة البرامج المستقلة، لكن في النهاية أنا بشتغل في المكان اللي برتاح فيه.
لماذا لا توجد في التلفزيون المصري برامج اخرى في قوة مصر النهارده؟؟
علشان الناس مابتعملش الصح .. فبالتالي مابينجحوش!!
##