أفكار شاب مدعوم !

رغم إن عمرى 20 سنة .. لكنى فجأة قررت أسأل والدى هو انت عارف يعنى إيه دعم .. ؟! فقعد يقول لى " كلام غريب " وفى النهاية اكتشفت إنه لا أنا ولا هو فاهمين حاجة
فقررت اسكت واريح نفسى، واريحه هو كمان من كلامى الرخم!
طبعا بعد ما خلصت الثانوية، وجيت من الوادى الجديد، علشان أدرس فى كلية الإعلام جامعة القاهرة، بدأت أحاول أفهم، وعرفت ان الدعم ده بتقدمه الدولة لأى مواطن لتخفيف أعباء الحياة عن طريق دعم أسعار السلع، يعنى البنزين سعره أكبر من السعر الحالى بكتير، بس هو رخيص علشان الدولة بتدعمه، وعرفت ان الدولة بتدعم المواد الأولية زى التعليم والصحة وكمان أنابيب البوتوجاز ، ولما كنت عايش فى الوادى الجديد كانت الحياة مختلفة شوية، مفيش معني للدعم لأن الناس في الوادي لسه طيبين والحياة رخيصة قوى، مثلا أبعد مكان ممكن تروحه مواصلات مش هيكلفك أكتر من نص جنيه، أما الأكل رخيص جدا لدرجة ان فيه فاكهة وخضار سعر الكيلو فيها بربع جنيه علشان مزارع شرق العوينات، الناس فى الوادى عايشة بالبركة مش بالدعم.
وأنا فى القاهرة لقيت الحياة مختلفة، الأسعار نار وكل حركة بتعملها بفلوس، والمفروض انه يكون فى دعم فى حاجات كتيرة، ولكن أنا شايف ان موضوع الدعم فى مصر عامل زى الرقص على السلالم، احنا مدعومين بالاسم بس، يعنى الدعم ما بيفدش الغلابة فى حاجة ، صحيح ان دعم السكر والزيت والشاي يتم بشكل منظم من خلال بطاقات التموين لكن فى حاجات لا يتم دعمها بشكل منظم زى أنبوبة البوتوجاز، ودى أنا شخصيا بعانى منها وفى أيام ما بلاقيش الأنبوبة، وكمان على ما بتوصل لى بدفع قد حقها 3 أو 4 مرات، وده بسبب استغلال بعض الناس، يعنى الحكومة مش لازم توفر الدعم بس، هى كمان لازم تتأكد انه وصل للغلابة.
ياااه ع العيش، هو ده اللى مجننى، الرغيف ب5 قروش، بس عنده كل أمراض الدنيا لدرجة ان لونه بقى اصفر، يعنى دعمه زى عدمه، والتعليم زى العيش بالظبط دعم من بره ومن جوه حاجة تانية.
بصراحة أنا فكرت كتير فى الدعم النقدى، يعنى أنا ممكن أخد فلوس من الحكومة من غير هى ما تدعم السلع، فقلت لو خدت 400 جنيه مثلا، يا ترى رغيف العيش هيبقى بكام، ممكن يوصل لجنيه وساعاتها، مش هتقدر تتكلم ولا ترفع عينك، ولو تعبت وروحت المستشفى ممكن التذكرة بدل ما هى بجنيه هتبقى ب20 جنيهاً ، يعنى خلينا عايشين زى ما احنا أحسن، الحكومة عارفة مصلحتنا أحسن مننا.
وبعدين أنا شايف ان كلام الدكتور على لطفى رئيس وزراء مصر الأسبق عن الدعم مقنع، لأنه بيقول ان الدعم هو حل مؤقت للفقر، لأن الحل الواقعى هو رفع المستوى الإقتصادى، علشان نرفع المستوى المعيشى.
عموماً ... دى أفكار شاب اسمه عمرو سليم قعد يفكر فى الدعم طول حياته، ويعمل خطط جوه دماغه، لكن فى النهاية ماوصلش لحاجة، بس قال يفضفض شوية .