هو لسه فيه حد بيحب بنت الجيران ؟!

زمان كانت حكاية بنت الجيران وابن الجيران حاجة مهمة جداً، ودائما أي شاب كان بفكر فى بنت الجيران، وخصوصا لو ساكنة جديد، وكانت تنشأ بينهما قصة حب، .. يا تري لسه فيه حد بيحب بنت الجيران زي زمان ؟! .
إيهاب علي- 26 سنة ليسانس آداب- مش بس حب بنت الجيران.. ده كمان تزوجها، ويقول: أنا كنت فاكر إن حكاية بنت الجيران دي حاجة قديمة ، ولكن اكتشفت إنها لسه موجودة، وعرفت كده من حوالي سنتين عندما انتقلت لسكن جديد مع أسرتي، فتعرفت على الجيران اللي ساكنين جنبنا، وكان عندهم بنت بصراحة أعجبت بأخلاقها وبشخصيتها، وحاولت التقرب منها بدون المعاكسات بتاعة زمان طبعا، ولا الوقوف تحت الشباك أو في البلكونة ولا كل الكلام ده، والحمد لله أهلها كانوا عارفين أخلاقي، وبعد سنة تقدمت لخطبتها والحمد لله تزوجنا .
أما محمد خالد- 20 سنة كلية تجارة- سيموت ويرتبط ببنت الجيران، وبيقول: أنا متربي أنا وأخواتي مع أولاد الجيران، ومن ضمنهم بنت كنت وأنا صغير أعتبرها زي أختي، بس بصراحة لما كبرت تعلقت بها، وصارحتها وهي عارفة أني أحبها، بس الحمد لله لا نفعل أي شئ خطأ، وهموت وأتزوجها، ولكني أنتظر حتى أنتهى من الدراسة وبعد العمل سنرتبط رسمي بإذن الله.
مش عارف أوصل لها.. ده حال عمرو إبراهيم- 25 سنة بكالوريوس خدمة اجتماعية- مع بنت الجيران.. ويقول: فيه سكان جدد سكنوا في نفس العمارة ومنهم بنت في منتهي الجمال والأدب، وأنا في البداية بصراحة كنت ناوي أعاكسها، ولكن بجد طلعت بنت محترمة جدا، وأنا دلوقتي مش عارف أوصل لها، ولا عارف أعبر لها عن إعجابي ازاي .
أما طارق حاتم- 24 سنة بكالوريوس تجارة- فكانت مشكلته كبيرة مع بنت الجيران.. ويقول: حصلت مشكلة كبيرة معي بسبب بنت الجيران، فأنا كنت أحب بنت تسكن فوق شقتنا، وكنت متردداً فى التعبير لها عن حبي وإعجابي، وفي يوم قررت أني لازم أصارحها، وكنت عارف مواعيد نزولها للجامعة، فوقفت أمام باب شقتنا، وأول ما نزلت أوقفتها، وقلت لها ( أنا معجب بيكي جدا)، ولكن في نفس اللحظة كان والدها نازل على السلم وكانت مشكلة كبيرة، فهو وقتها لم يفعل أي شئ، ولكنه انتظر عودة والدي من الشغل ونزل قال له كلمة واحدة بس(ربي أبنك بدل ما أربيه أنا)، وطبعا الحمد لله والدي رباني ساعتها كويس !!.
أما شريف كمال- 19 سنة كلية تجارة- فيمشي في شارعهم 5 مرات في اليوم علشان يشوف بنت الجيران، ويقول: أنا أحب بنت ساكنة في نفس شارعنا بس عمري ما كلمتها، وأكتفي إني أشوفها بس، وساعات أمشي في اليوم حوالي 5 مرات في الشارع علشان أشوفها ماشية أو واقفة في البلكونة، وأصحابي يضحكوا علي في الموضوع ده، وشايفين إني أعمل حركات قديمة .