خليك ابن بلد .. ومدقدق!

أنت فاكرني أجنبي ولا إيه.. دا أنا ابن بلد ومدقدق... الجملة دي قالها أحمد مكي في أحد أفلامه، لما حد أراد أن يضحك عليه في حاجة وافتكر إنه أجنبي، بس هو طلع مفتح أو " مدقدق " زي ما قال..
تصوروا فيه أكثر من دراسة غربية أكدت إن الرجل المدقدق في الوقت الحالي هو المطلوب في كل شئ ، وراحت على الشخص الخجول أو الرجل الخام الذي انتهي زمنه.. تعالوا نشوف ايه الحكاية...
الدراسة أعدها مجموعة من الباحثين في جامعة إيلينوي بأمريكا قالت أن الرجل الناصح( أو اللي بنسميه عندنا المدقدق) أكثر جاذبية للمرأة، وأكدت هذه الدراسة أن المرأة تري هذا الرجل الذي يخطط ويصحصح لكل شئ قادر علي توظيف قدراته لتأمين حياتها، كما أكدت الدراسة أيضا أن هذا الرجل مطلوب أكثر في كل شئ في الحياة وخاصة العمل، وأكدت أن الرجل المسالم أو الخجول أو الخام لم يعد له مكان في قلب المرأة أو في الحياة بشكل عام، على الرغم من أنه منذ فترة كان هو المطلوب، كما أجرت الجامعة استطلاع رأي على الأولاد في نفس الموضوع فكانت النتيجة أن نسبة كبيرة من الشباب يريدوا أن يكونوا ناصحين أكثر في التعامل مع الحياة.
وفيه دراسة أمريكية أخري اسمها كيف تصبح رجلاً ناصحاً وذكياً في التعامل مع أي شئ ، وتلخصت النتيجة في الأتي:
* عدم إعطاء الفرصة لأحد لاستغلالك بشكل يفيده هو أكثر.
* لا تظهر للمرأة أنك خجول حتى ولو كنت كذلك.
* لا تدعي معرفتك بكل شئ ولكن لا تظهر جهلك بأي شئ.
* لا تجعل أحد يضحك عليك في سعر أي شئ .
هذا عن الدراسات الأمريكية، ولكن يا تري الوضع بين الشباب والبنات في مصر شكله إيه، هل فعلا البنات تفضل الرجل الناصح المدقدق، وهل الشباب في مصر كذلك .. تعالوا نشوف...
بالنسبة للبنات .. تقول أماني صلاح- 22 سنة كلية إعلام-: لو بختار شخص للزواج فأكيد سأختار الشخص اللي يقدر (يقاوح) في الدنيا، ويكون " مفتح وناصح " ، فهذا الرجل أفضل من الرجل الخجول أو الخام في هذا الزمن، وتتفق معها إسراء عطية- 23 سنة كلية تجارة- وبتقول : أصلا في زماننا مفيش ولد مغمض، فكل الشباب دلوقتي يتبع مبدأ الفهلوة، والدنيا عايزه كده، وأنا فعلا بفضل الرجل ده على الرجل قليل الخبرة.
وبتقول أسماء طه - 25 سنة ليسانس آداب-: لو لم يكن الرجل ناصح ومصحصح للحياة لن يستطيع أن يأخذ حقه في الدنيا، ولكن المسالم أو المؤدب بمعني أصح لن يفيد الآن، ولا مانع من أن يكون ناصحأً ومؤدباً في نفس الوقت، ولكن إيمان محمد -23 سنة كلية آداب- تقول: أهم شئ في الرجل أدبه وأخلاقه، ولكن المهم ألا يكون ضعيفأً.
أما عن الشباب فيقول محمد عبد الفتاح- 23 سنة كلية تجارة-: أنا لو مش مفتح ومدقدق ( هاخد على قفايا) وبجد عن تجارب كثيرة، فالزمن ده محتاج الواحد يكون مصحصح لكل شئ، فأنا مثلا حبيت واحدة وكنت مسالماً جدا معاها ، ولقيتها بتستغلني وضحكت علي في الآخر، فمن ساعتها عرفت قيمة النصاحة والفهلوة.
أعمل ايه بطيبتي.. وده كان رأي أمير شعث- 24 سنة كلية آداب-: لو حد دلوقتي مغمض يبقي غبي، لإن الزمن ده فعلا محتاج حد ناصح يقدر يتعامل معاها!!.