إعترافات مهندس فى الحى !

" يعني هو مهندس الحي بيتولد من بطن أمه مكتوب عليه إنه فاسد ومرتشي؟؟" بهذه الكلمات افتتح المهندس ثروت سليمان ضيا بحي حدائق القبة حديثة معنا ، ولم يكن يهمنا الحديث مع مهندس بعينه .. لأن السمعة السيئة للأسف طالت كل مهندسي الأحياء بسبب كثرة حوادث الرشوة والفساد ..ولذلك واجهنا أحدهم بما سبق بكل بساطة .. وصراحة .
أضاف المهندس سليمان " مهندس الحي شاب مجتهد ومتفوق استطاع أن يتفوق ويدخل كلية الهندسة لكن حظة العثر هو الذي قاده للعمل في المحليات .. و90 في المائة من المهندسين يعملون في الأعمال الخاصة، بينما النصيب يقود الباقين للعمل في المحليات، المرتبات هنا 200 و 300 جنيه ، وأنا بعد ما بقيت مدير ادارة مرتبي بالحوافز والبدلات مابيكملش 800 جنيه ، إزاي الكلام ده ينفع ؟ ده غير السمعة إنه مرتشي وفاسد، علشان " يملوا عين " المهندس في الحي لازم يقبض 5 أو 6 آلاف جنيه في الشهر"
ولكن لماذا ظهرت هذه السمعه ؟
هقولك ، الحي به 5 مهندسين منهم 3 مديرين لا يذهبون بأنفسهم في المعاينات، الباقون مؤهلات متوسطة ، يعني يوجد عندنا عدد كبير منهم المسئولين عن المعاينات في الشوارع ، لو واحد فيهم جاء وقال لي إن مفيش مخالفه هصدقة لأني معنديش مهندسين فاضيين يلفوا في الشوارع ، كمان النصابين كتير، يعني مثلا واحد ينزل في الشارع يلاقي واحد طلع له وزعق وقال " أنا مهندس في الحي ودي مخالفة " ، صاحب الإشغال يخاف فيعطيه أموالا من غير ما يسأل هو ده بجد شغال في الحي ولا لأ، وفي الآخر يقولك اصل مهندس الحي جاء وأعطيته 20 جنيهاً ، يعني بذمتك فيه مهندس أهله تعبوا فيه هيمد ايده وياخد 20 جنيهاً ؟!!
كلامك يوحي وكأنه ليس هناك مهندسون مرتشون ؟
أكيد يوجد ، المهندسون زي أي مهنة فيهم الكويس وفيهم الفاسد، لكن ما الحل؟؟ السبب في الفساد هم المخالفون ، لو صاحب البيت عامل كل حاجة تمام والله لو جاله مين مش هيدفع له حاجة لأنه مش محتاج، ولكن لأنه فاسد فهو يبحث عن إفساد من حوله، المهندس الفاسد هو من يأخذ فلوس علشان يعدي حاجة غلط..
طيب واللي بياخد فلوس علشان تبسيط الإجراءات تحت مسمى " الإكرامية " ؟
لأ، مش إكرامية ولكن خليني أفهمك، مهندس الحي هيعيش إزاي بالمرتب اللي بياخده؟؟ مش ممكن يعيش بيه، فهو بيشتغل شغل خاص ، يعني لو انت هتبني عمارة وإنت مش متخصص في البناء، لو رحت لمكتب خاص هياخد منك مثلا 10 آلاف جنيه علشان يخلص لك الرسومات والورق، لو رحت لمهندس في الحي هياخد منك 6 أو 7، ليه؟؟ لأنه عارف القانون والإجراءات وبالتالي هيخلص لك الورق أسرع.
ولكن هل عمل مهندسي الحي في اعمال خاصة قانوني؟
أكيد قانوني، هو الدكتور حرام يفتح عيادة يشتغل فيها ؟ صدقنى يوجد مهندسون في الأحياء مابيناموش الليل علشان يشتغلوا ، مفيش حل تاني!!