الطالب المصرى طول عمره "وثيق من الفوز"

اذاكر وانجح .. الاتنين
بمناسبة الاجازة الاسبوعية لطلاب المدارس حبنا نقدم لكم موضوع قد يكون مشاركة منا لمعاناتكم اليومية طوال ايام الدارسة وتاكيدا منا ايضا اننا نشعر بك ونساندك قلبا وقالبا ,, واللى مش مصدقنا يجرب ولا بلاش يجرب يتخيل بس انه بيعمل مجموعة الحاجات دى:

جرب تقف في على رجلك حوالى ساعة فيما يسمى "طابور الصباح" و تبدأ يومك بتمارين عجيبة و اللي ملهاش علاقة بالرياضة والله يجازة اللى اختراعها و كل ده مصاحب لصوت مدرس الألعاب وهو بيقول "واحد إتنين تلاتة أربعة هوب إتنين تلاتة أربعه , ومدرسة صفا مدرسة انتباه" فهدة الحيل دى على الصبح مع السقعة بتعمل شغل عالى فدماغ الطالب يطلع الفصل ينام لحد المرواح وهو كله لراحة طاقم المدرسين . 

طب جرب تسمع الإذاعة المدرسية اللي بنشكر فيها مدير المدرسة دايما بس علي إيه معرفش و طبعا هذه الاذاعة لابد وان تبدأ بالجملة المشهورة "صباح الخير صباح الامل يتشرف فصل 3/3 ان يقدم اذاعته المدرسة على الهواء مباشرة وخير ما نبدأ به هو القراءن الكريم والطالب فلان الفلانى" ومعاك بقى ساعة اغانى واخبار ومعلومات ووجع دماغ والعيال واقفة فى الطابور اصلا نايمة , الحسنة الوحيدة فى الموضوع الميكروفون اللى العيل من دول يمسك فيه بايده وسنانه و كأنه صباع عسلية مثلا

جرب تدخل فصل تلاقي كل أربعة في ديسك واحد وخد عندك بقى خناقات للصبح العيل من دول تخلص السنة بس يكون بطل كونج فو , وفى الاخر يقولك مش عارفين ايه كمية العنف اللى بقى فيها طلاب المدارس .

و إيه رأيك لو تجرب تستحمل المدرس وهو بيتفلسف عليك في حصة الدين و يعلمك إن الإبتسامة صدقة وتبوص فى وشه تحس انك قاعد مع عشماوى ولو ضحكت في وشه يقولك بتضحك على ايه يا اهبل , وقال بيسألوا ايه سبب تفسى الشيزوفرنيا فى مصر.

طب جرب بس تنسي قلمك فيتعوج عليك المدرس ويرسم نفسه عليك أوى و يقولك : ده القلم بنص جنيه لو مش معاك انا ممكن أسلفك وفى نفس ذات الوقت يسأل "حد معاه قلم أحمر أصحح بيه , اهلا بيك فى مصر.

جرب تنزل فسحة مدتها 10 دقايق فتبقى مش عارف تعمل ايه ولا ايه في الوقت ده .. تاكل سندوتشاتك .. تشتري حاجة حلوة من الكانتين اللى بيقى ضرب نار من الهجوم عليه.. ولا تدخل الحمام اللي أجارك الله ولا تشرب من الحنفيات اللي تصميمها نفس تصميم حنفيات البهايم .
ولا اقولك جرب ترجع من الفسحة علي فصلك و تلاقي المدرس عاملك إمتحان مفاجئ مش علشان إختبار قدراتك لا .. هو بس "مكسل يشرح وطبعا هتجيب صفر فالاستاذ يكمل رخامته ويقولك "بكرة ورقة الامتحان تيجى عليها امضاء ولى امرك " . 

جرب انك تفرح بحصة الألعاب ولا الموسيقي وتلاقي المدرس بيقولك "إنزل لم الزبالة من الحوش" صدمة. طب جرب يبقي عندك أعمال سنه و غصب عنك تستحمل عدم إحترام المدرس ليك و احتقاره ليك فى الرايحة والجاية ولو خرجت عن شعورك و واشتكيت بس تاخد صفر كبير أد الدنيا ..

جرب تروح بيتك الساعه 3 و أحيانا 4 و مطلوب منك تتغدى و تكتب واجب لخمس مواد و كمان تذاكر اللي أخدته في المدرسة و تروح الدرس و فى الاخر أهلك يقولوا لك لازم تنام بدري .. 

ومازال الطالب المدرسى من اولى ابتدائى لحد ما يخلص جامعة بيقول" السنة دة بقى لازم اشد حيلى" , وعلى رأى سعيد صالح "اذاكر وانجح.. الاتنين"
وفى الاخر ياريت تلقوا نظرة على النصب التذكارى للطالب المصرى وتقولوا رأيكم.