لو عربيتك بتحدف.. ما تظبطش زوايا؟

لو عربيتك بتحدف وانت ماشي أو لما بتلف الدركسيون علي سرعات منخفضة بتسمع صوت الكاوتش بيحتك بالأسفلت (صوت الأمريكاني) يبقي لازم تظبط زوايا، لكن الأول لازم تتأكد إن العربية محتاجة فعلا ظبط زوايا بدل ما تروح لمركز وتكون العربية مش محتاجة ويشتغلوك.. طيب إزاى نتأكد إن العربية محتاجة ظبط زوايا؟
أولا: لازم نظبط ضغط الإطارات لأن لو ضغط الهواء فى إطار قليل العربية هتحدف ناحية هذا الإطار (الإطار اليمين مثلا) لأن احتكاكه بالأرض هيكون أكتر وسرعته أقل بجزء بسيط جدا من الإطار اللي في الناحية التانية -الشمال- (لاحظ إننا بنتكلم عن إطار أمامى للعربية لأن الإطارات الأمامية هي المسئولة عن توجيه العربية.)
تانيا: لو فيه مشكلة فى العفشة لازم نصلحها الأول (ممكن لو جلبة مقص متآكلة أو مساعد معووج أو شمعدان متنى تلاقى العربية بتحدف).
ثالثا: لو فيه مشاكل فى الجنوط ممكن تأثر على زوايا العربية وتخليها تحدف وطبعا بنكون عارفين عربيتنا وعارفين لو فيه جنط فيه مشكلة وممكن نكشف على الجنوط فى أي مركز ونعرف ويبقى الحل المظبوط هو تغيير الجنط اللى فيه المشكلة أو استعداله لو حالته تسمح بالتصليح.
لو عربيتك بتحدف.. ما تظبطش زوايا؟
رابعا: معروف إن الإطارات لازم نبدل مكانها من الخلف للأمام ونلففها كل 20 ألف كيلو متر علشان نحافظ عليها وعلشان نخللى التآكل فى الأربع عجلات متساوى علشان كده ممكن العربية تكون مظبوطة وما فيهاش زوايا (يعنى مش بتحدف) ونقوم بتبديل الإطارات نلاقى العربية بتحدف، والسبب إن نسب التآكل فى الإطارات مختلفة عن بعضها علشان كدة لما نبدل مثلا الإطار اليمين الأمامى ونرجعه ورا يمين ونجيب الإطار اليمين ورا ونركبه يمين فى الأمام يكون التآكل فى الإطار - من الاستخدام العادى- مختلف عن التآكل اللى كان فى الإطار اللى بدلناه وساعتها هنحس بفرق لأن استهلاك وتآكل الإطارات الأمامية بيكون أكتر من استهلاك الإطارات الخلفية.. والحل بسيط .. نمشى بالعربية حوالى 2000 كيلو متر فيحصل تآكل فى الإطارات فى الأجزاء اللى نسبة التآكل فيه كانت قليلة بحيث ينتظم التآكل فى كل إطار -يعنى الإطار بيظبط نفسه مع المشى بالعربية- وساعتها نلاقى الزوايا ظبطت.. ومهم جدا إننا نعرف إن فى الحالة دى نسبة الخلل اللى بنشعر بيها فى الزوايا نتيجة تبديل الإطارات بتكون قليلة يعنى نلاقى العربية بتحدف لكن مش بالدرجة اللى تخلينا نقلق ونروح جرى نظبط زوايا
بعد ما نعمل الأربع خطوات اللى فاتت نمشى بالعربية كام يوم ونراقبها ونشوفها بتحدف ولا لأ .. إذا كانت بتحدف نروح نظبط زوايا.
ملاحظة مهمة : فيه ناس وهمّا بيراقبوا العربية بيقولوا العربية ساعات بتحدف يمين وساعات تانية بتحدف شمال .. ولازم نعرف إن العربية إما تحدف يمين أو شمال ما ينفعش شوية يمين وشوية شمال والسبب فى الشكوى إن الطريق هو اللى مش مظبوط يعنى ساعات الطريق بيميل يمين فنلاقى العربية بتحدف يمين وساعات بيميل شمال فنلاقى العربية بتحدف شمال .. علشان كده لازم نجرب العربية على طريق مستوى.