كلام مش فارغ

مش عيب عجوز زيي يكتب كلام فارغ الضحك أحسن دوا يشفي عليل فارغ
دخل الشتا في المصيف
والبحر صيف فارغ
وما عادش زي زمان
كازوزة أو ألبان
بناخد المليان
ونرجع الفارغ
**
أنا كنت طالع زمان
في الصورة في الجورنان
شنبي فخيم السواد
واسمي في العنوان
الشيب لعب لعبته
شوقني ع الفاضي
جوزني حلم البحور
وأنا والزبد راضي
واما أكل لحيتي
سلمني للقاضي
وقال له طالب طلاق
الأهتم المذكور
**
يا مصطفي يا كريم
صلي عليك ربك
قلت الدوا ضحكتي
طلع الدوا حبك
الدنيا غيرك عدا
أتمني أكون صاحبك
وأقول بعلو الندا
للفرقة والجمهور
يا تقبلوني كده
يا اخرج .. وأكون معذور
**
بلياتشوهات أرنبات
وذكريات عيرة
سيرك القبل والدموع
والضحك والحيرة
ما فضلش غير الباروكة اللي اتملت .. بردون
وسيف محارب خشب
وتاج من الكرتون
وأرجون طيلسان
بقي م السنين جربان
التمثيلية انتهت
والفرقة جالها الدور
وبطلها قاعد حزين
ع القهوة من غير دور
أما اللي كان كومبارس
خد جايزة التمثيل
والضحك أول طريق
الدمع لما يفور
**
جر الكلام الكلام
وجر رجل النور
في الشمس داب الفؤاد
والذنب صار مغفور
واللي بدأ بالهزار
أو كان بدا انه هزار
كان كله جد ف جد
**
مقياس ذكاء الولد
انه يحب الورد
واللي قلوبهم دفا
ما تاخدش دور البرد
وردة جمال الصبا
ما تحبش الماكياج
واللي سلامهم قبل
يسلموا بمزاج
واللي عيونهم نهار
ليلهم ما يبقاش حزين
واللي يا ناس مش كده
كده يبقي وضعه مهين
تضحك عليه العيال
وتزفه في الطرقات
ويبقي فردة شراب
توأمها ضاع أو مات
شراب ما حدش لبسه
من سنوات
**
مش عيب عجوز زيي
يقول كلام فارغ
لان كل الكلام
ماهوش كلام فارغ
حتي النكت والقفش
جواه معاني جد
ومنكتاتي حزين
في الشارع المسكين
أعداده مالهاش عد
وكل ما الهم زاد
تتضاعف الأعداد
ومصر أحلي البلاد
في القفش والتنكيت
وعشان يداري القبح
مش عيب عجوز زيي
يقول نكت للصبح