الشاعر فؤاد حجاج يكشف للاخبار المسائى احدث اشعاره «ماشفتهاش ؟»

ماشفتهاش ؟
في كل شارع وحاره
و ف كل درب وحي
سألنا كل الخلايق
ولا سيبنا منهم حي :
ماشفتهاش يا للي رايح ؟
مالمحتهاش ياللي جي ؟
دي هيه عطر الروايح
وهي بنت الضي
***
ياااه ياحسنها
نوها وحضن اهلها
شوف قلبها
واعرف مداها ومدها
ممدود بمطلع فجرها
يا همها
ياسيدنا اقرا ف سطرها
هتحبها
دافي _ هياخدك _ حضنها
وتبقي في ضلها .. رابح
ماشفتهاش ياللي رايح
مالمحتهاش يللي جي ؟
دي هي عطر الروايح
وهي عطر الضي
======
حبيبتي وعمري مشواري
علي الدنيا اللي فيها باتوووه
واندهلك .. من التوهه .. ترديني
وفوق جرحي تفوت ايدك
بضي الحلم ... تداويني
ما انا الصابر بطول عمري
وعين ايوب علي صبري
دموعها تسح .. تواسيني
وجوايا فرس جامح ..
ماشفتهاش يللي رايح
ما لمحتهاش ياللي جي ؟
دي عطر الروايح
وهي بنت الضي
======
وياااه علي يااااه
علي دنيتنا .. دواره
تلف تدور تعدي حياه
لاكين التوهه .. اماره
بتاخد ناس
وبتجيب ناس
وفيهم ناس
تقولشي الماس
وناس تانيه ماليها اساس
ترجرج فيا .. ماضيا
اضيع مني .. واندهني
واقاوح... صوتي عاد ليا
وعاد تاني عشان قاوح . .
ماشفتهاش ياللي رايح ؟
ماشفتهاش ياللي جي
دي هي عطر الروايح
وهي بنت الضي