عروستى (1)

رسوم : عبدالرحمن
أ استقبال حنان غروب داخلى
فى مرآة الكونصول تنعكس صورة حنان بملابس منزلية.
يد تلقى بفازة تحطم المرآة.
حنان: صارخة. أنت بتكسر المراية؟
يوسف: بهياج ضاربا زجاج نافذة بيده. أنتى هتمرضينى. ارحمينى.
حنان: صارخة. وكمان بتكسر القزاز؟
يوسف: ضاربا رأسه فى الحائط. أعمل إيه؟ أعمل إيه؟
حنان: أنت فاهم لما تضرب دماغك فى الحيط هتهوشنى؟
يوسف: بلاش.. أكسر لك دماغك أنتى. يصفعها.
حنان: تصفعه. طب أهو.
يوسف: يشدها من شعرها بجنون. يا بنت ال
تنشب أظافرها فى صدره وتمزق ملابسه وتضربه بالشبشب. يبصق عليها
فتبصق عليه. جرس الباب يرن متواصلا. يلكمها فى وجهها فتقع. تنهض
لتركله فى مؤخرته. يرميها بتمثال. طرقات على باب الشقة.
صوت: افتح يا أستاذ يوسف. افتحى يا مدام حنان. إحنا طلبنا النجدة.
تقذفه بمجموعة أطباق. يقذفها بأباجورة مضيئة تسقط على ستار النافذة
فتبدأ تحترق وينبعث منها لهب يمتد لصورة زفافهما المعلقة.
نزول العناوين
1 منزل حنان غروب خارجى
دخان كثيف من نافذة شقة حنان بالعمارة.
الكاميرا تقترب من النافذة فنسمع الزوجين.
حنان: مش عايزاك. مش طايقاك. طلقنى.
يوسف: بس كده؟ روحى وأنتِ طالق.
سيارة إسعاف تقترب ثم صوت سيارة نجدة وسيارة مطافئ تدق أجراسها.
سيارات تظهر وينزل منها أصحاب الزوجين.
2 استقبال حنان ليل داخلى
صورة الزفاف احترق نصفها الأسفل. مأذون جالس وسطهما وعليهما آثار
المعركة. صديقات حنان خلفها وأصدقاء يوسف بجواره. المأذون يغلق الدفتر.
أصحابه: ألف مبروك يا يوسف.
يوسف: عقبالكم جميعا. لحنان. تسمحى تدينى مفتاح شقتى القديمة؟.
حنان: قصدك الجرسونيرة. خد عشان تتصرمح مع النسوان الوسخة إنت وأصحابك.
يوسف: اخرسى.أنتِ طالق ما عدش لك حكم علىَّ!.
يهمان بالعراك بالأيدى والأقدام. الكل يتدخل لمنعهما. يوسف يخرج وأصحابه
يحملون عنه حقائب موضوعة عند الباب. صاحبات حنان يزغردن.
3 سيارة يوسف ليل خارجى
يوسف يقود السيارة بجوار النيل. يأخذ شهيقا ويفتح الراديو فيسمع أغنية
أم كلثوم. ''أهرب من قلبى أروح على فين.. ليالينا الحلوة فى كل مكان''.
يغلق الراديو. ونسمع صوت يوسف وحنان.
حنان: بحبك يا يوسف. مقدرش أعيش من غيرك. اللحظة اللى بتغيب فيها عنى مالهاش طعم ولا معنى.
يوسف: بحبك يا حنان. انتِ أغلى حاجة فى حياتى.
يوسف: ساخرا بصوت عال. أوهام.
يرى من النافذة حبيبين فى حالة هيام فيهدىء سرعة السيارة ويصيح.
يوسف: كان غيرك أشطر يا قفل.
الاثنان يفزعان وينظران له بدهشة.
4 منزل يوسف ليل خارجى
يوسف يوقف السيارة ويدق كلاكس. يستيقظ البواب.
البواب: أستاذ يوسف؟ خير؟
يوسف: خير. .شر. أنت مالك؟ شيل الشنط وأقفل العربية وحصلنى
البواب يفتح خلفية السيارة ليخرج الحقائب.
نافذة تفتح بالمنزل ونرى الحاج شديد وزوجته نعيمة وهما عجوزان
ينظران بفضول ومعهما جرو ينبح. من باب المنزل يخرج النقيب
حسنين بزيه الرسمى.
الضابط: أهلا يا أستاذ يوسف.. خير؟.
يوسف: وهو يدخل المنزل. خير.. شر. كله محصل بعضه.
الضابط يهز رأسه ويفتح شرطى باب السيارة له ليركب.
5 أستوديو يوسف ليل داخلى
صالة مفتوحة على المطبخ والحمام و قاعة للرسم خلف أرش مغطى بستار.
أريكة ومقعد هزاز ومكتب ودولاب مستطيل.تمثال أو أكثر ولوحات من رسم
يوسف و مستنسخات للوحات عالمية. يوسف يتأمل فوضى المكان لأنه مهجور.
يزيح الستار الذى يغطى المرسم وبه حامل رسم ومائدة عليها الألوان وكتب
ولوحات مكومة بالأركان. يفتح الشرفة فيرى الحاج شديد ونعيمة فى نافذتهما
ينظران نحوه فيسرع بغلقها. يدخل البواب حاملا حقيبة.
يوسف: الاستوديو كله تراب. من بكرة تشوف لى شغالة.
البواب: حاضر. يضع الحقيبة يخرج ليأتى بغيرها.
من باب الشقة يظهر فى الردهة شديد ونعيمة.
شديد: هامسا. خبر إيه يا عبده؟
البواب: الظاهر الست حنان مراته أدته السكة.
نعيمة: يستاهل. من عمايله. طول عمره راجل عينه فارغة من وهو عازب.
البواب يضع بقية الحقائب ويخرج ويغلق الباب.
6 نوم يوسف ليل داخلى
يوسف بالبيجاما يخرج محتويات حقيبة ويرصها بالدولاب. يده تلتقط ألبوم صور
يفر صفحاته فنرى صورا متتالية.
7 فوتومونتاج
(فلاشات باك) صورة الألبوم ثابتة تستدعى
ذكرى قديمة فتتحرك لثوانٍ لنرى يوسف وحنان فى أوقات وأماكن مختلفة.
جالسان بهيام على كورنيش النيل يقبلها خلسة.
فى مرسمه يرسمها.
أعلى جبل المقطم يحتضنها وشعرها يطير
يتعانقان فى الفراش.
يوسف: بوسة ونغمض وياللا..
فى ملهى يرقصان على أغنية «إن كان دا حلم دا يبقى جميل خلينى أحلم بيه على طول».
8 نوم يوسف ليل داخلى
يوسف: الواحد كان أهبل للدرجة دى؟!
يلقى الألبوم ويدخل الفراش.يخلع الدبلة ويلقيها فى سلة المهملات.
ثم يلتقطها ثانية ويضعها فى درج الكومودينو.
يوسف: وليه؟ تتباع تجيب قرشين.
يحضن الوسادة. يطفىء المصباح المجاور. ثم نسمعه يبكى.
9 شاطئ بحر فجر خارجى
شاطئ به نخيل فى جو ضبابى. الموج يتلاطم والعصافير تزقزق. فتاة بوجه رومانسى بفستان طويل شفاف وعقد فل يحيط عنقها. الصورة غائمة كأنها لوحة. يسقط عليها شعاع أول ضوء. الفتاة تتقدم ببطء باتجاه الكاميرا وبيدها وردة بيضاء تقدمها لشخص لا نراه. ثم تثبت الصورة وتتلاشى ببطء.
10 نوم يوسف نهار داخلى
يوسف يقبل الوسادة. يفتح عينيه بدهشة. جرس التليفون يدق وينقطع وصوت يوسف فى الأنسر ماشين.
يوسف: أنا مش موجود حاليا.من فضلك سيب اسمك ورقم تليفونك وهاتصل بيك بعدين زهير: من الأسبيكر، أنا زهير يا يوسف أنت لسه نايم ؟ جاى الشغل النهارده.. ولا هتأجز؟
ألو.. ألو.
يوسف يفتح النافذة وعلى حافتها أصيص زرع ذابل.يهم يسقيه برشاش ماء
ثم يتركه. ينظر لصورته فى مرآة كبيرة. ويحدث لنفسه بصوت مسموع.
يوسف: أنت كويس يا يوسف. أنت سيد الرجالة. بس ما حدش فاهمك. لكن ولا يهمك. ابتسم .بكره هيبقى أحسن من إمبارح.
يصطنع ابتسامة تتلاشى ويبصق على المرآة.
11 مبنى وكالة إعلانية نهار خارجى
سيارة يوسف تتوقف أمام مبنى عليه لافتة ( وكالة... للإعلان )
يترك السيارة للمنادى ويلتقى على السلم بسوزان.
يوسف: صباح الخير يا سوزى.
سوزان: بغطرسة. المدير سأل عليك إمبارح.
يوسف: مبتسما. كنت بطلق. باركى لى.
سوزان: مبروك عليها. وتتقدمه داخلة المبنى.
يوسف: ينفخ بغيط. كلهم معقدين.
12 مكتب يوسف نهار داخلى
يوسف يرسم فتاة تشبه فتاة الحلم. زهير على مكتبه يراقبه.
زهير: مكلضم ليه يا جو؟
يوسف يتنهد وأمامه زجاجة برفان كبيرة.
يوسف: ماليش مزاج يا زهير. طلبت إجازة سى مفيد ما رضيش إلا ما أخلص الحملة بتاعة برفان نقاء.
زهير: ناظرا لرسم الفتاة. وأنت بتشتغل ولا بتلعب؟
يوسف: مش عارف. أصل جت لى فكرة بدل ما أعمل الدعاية بصور موديلز، أرسم موديل من خيالى.
زهير:ضاحكا. للدرجة دى ما بقتش طايق النسوان؟.
يظهر مفيد داخلا من خلف يوسف.
يوسف: أنا فنان مش مصوراتى ولما أرسم بنت جميلة أحسن من أى واحدة أصورها. وهوفر للوكالة أجر الموديل.
مفيد: ما حدش قالك توفر لنا. عايز تعمل فيها فنان, أقعد فى بيتكم وفن براحتك.. والمعلن طالب موديل جديدة ما ظهرتش فى أى إعلان. فاهم؟ .
يوسف: من تحت ضرسه. فاهم.
مفيد: عندك واحدة تنفع ولا نشوف لك؟
يوسف: فيه واحدة اسمها سونيا بس لسه ما كلمتهاش.
مفيد: إنجز وخلصنى. بالحق. سمعت أنك طلقت. برافو. ( يخرج).
يوسف: لو أقدر أطلق المدير كمان.
13 ملهى ليلى ليل داخلى
يدخل يوسف فتقف شلته عند البار ويرفعون كئوسهم.
زهير: فى صحة الحرية.
الكل: فى صحة الحرية. يحملونه ويقذفونه لأعلى مرات والزبائن تصفق.
زهير: فلتسقط مؤسسة الجواز الفاشلة ولتحيا العزوبية. سلام مربع يا جدع.
يوسف: انتوا بتزفونى؟.
زهير: الراجل يتزف مرتين.ليلة ما يتقندل على عينه، وليلة ما يطلق ويتجوز السعادة.
محسن: مراتك ست كويسة يا يوسف. صالحها أحسن
يوسف: اسمها طليقتى يا دكتور محسن ومش عايز أسمع سيرتها.
محسن: يبقى خلى بالك من نفسك. عادة الطلاق بتؤدى لاكتئاب.
زهير: ما تيجوا بكرة نعمل فى شقتى بارتى مزز.
محسن: لا ياعم أنا متزوج وأعول.
وجدى: وإيه يعنى ما أنا متزوج وأخون. عقبال ما نبارك لك ع الجوازة التانية يا يوسف. يوسف: وأنا مجنون أعملها تانى؟
وجدى: لا المرة دى عروسة تكيد بيها الأعادى.. قمورة وصغنونة.
فتاة: على البار. زيى كده.أنا مستعدة أتجوزك ودلوقتى حالا.
يوسف: رسمى ولا عرفى؟ ولا شفهى؟!
الفتاة: تأخذه من يده. اللى يجيبه ربنا كويس. يالا بينا.
وحيد: اجرى يا بت ألعبى بعيد. بص ياجو صنف البنات تقولها صباح الخير تقول لك أتجوزنى الأول. مساء الخير تقول لك صلح غلطتك. لكن المطلقة جاهزة بالشقة ومقرشنة من طليقها.تروح بشنطتك تسكن معاها واكل شارب نايم لحد ما تزهق.
زهير: أيوه خليك مع المتر وحيد تكسب قضية النسوان.
وحيد: أهم اللى فى الركن دول جروب مطلقات.سيبنى أظبطك الليلة وأنقطك بواحدة فشخ.
يوسف: مشيرا إلى سونيا التى تضع رأسها فى صدر صاحبها بهيام. لا أنا عايز من دى يا حزنبل.
نفسى فيها من زمان وعايز أعملها موديل بس ميتة فى الواد بتاعها.
وحيد: باستخفاف.. سونيا؟ بس كده؟
يتحرك ويحدث سونيا فتنهض وتقترب من يوسف.
زهير: قلت لك الستات الخيانة فى طبعهم.
سونيا: تراقص يوسف. بجد أنفع فى الإعلانات؟
يوسف: تنفعى طحن.
سونيا: برقة. أنا حبيتك قوى يا جو.
وحيد: يراقص امرأة. أنتى شربتى كتير يا روحى. هاتى مفاتيح عربيتك أوصلك.
المرأة: طب وأنت تروح إزاى؟
وحيد: معايا شنطة هدومى بالصدفة. ملتفتا لسونيا بجواره. وأنتى كمان خلى يوسف يوصلك سونيا: دا أنا اللى أوصله. تتأبط ذراع يوسف ثم تنظر لصاحبها . خد السكة وروح.
زهير: ليوسف أقطع دراعى زمان مراتك دلوقتى بتعيط بدل الدموع دم.
14 استقبال حنان ليل داخلى
فتح زجاجة شمبانيا .يافطة بها بالونات كتب عليها طلاق بارتى للنساء فقط .
جمع سيدات بملابس عارية يتصايحن.
مروة: تقدم كأسا لحنان. فى صحة شبابك وجمالك.
حنان: ما أنتى عارفة عمرى ما شربت.
نجوى: تسقى كأسا لحنان. دى شمبين. عيشى حياتك. دوسى.
مروة: تدس فى فم حنان سيجارة. دى ليلة العمر.زيحى
رانيا: أنا مقدرش أشرب جوزى هيرجع من الكويت كمان شهرين بعدين يشم ريحة بقى.
يرقصن بلدى ثم ''سلو''. ومروة تحتضن حنان.
مروة: بذمتك مش العالم من غير رجالة ألذ؟
جرس الباب يدق وتفتح مروه فتجد شابا صغيرا.
مروة: راجل؟ ما يلزمناش النهاردة. وتغلق الباب.
رانيا: افتحى. دا حسن ابن خالتى جاى يوصلنى بعربيته.
نجوى: متحركة للشاب يا مرحب.
رانيا: هامسة. أتلمى يا نجوى. دا مش لك أنتى. وتهمس لحنان إيه رأيك يا عروسة؟
حنان: تتأمله ثم بسخرية ما عندكيش على أصغر شوية؟
السيدات وقد اكتشفن وجوده يهجمن عليه متصايحات.
النساء: هييه راجل.. راجل.
وقد انصرف الكل عدا مروة ونجوى ترتبان المكان.
حنان: تحتضن دبدوبا كبيرا. لا المرة دى لازم أدقق كويس عشان ما تحصليش الخيبة اللى فاتت وبصراحة ماليش مزاج للجواز دلوقتى. تغنى بدلع '' أنا لسه صغيرة ..
أنا لسه صغيرة''.
مروة تمسك بصورة لحنان ويوسف معا.
مروة: شوفى لقيت إيه.
حنان تنفجر فجأة فى البكاء.
مروة: بتعيطى على إيه يا خايبة؟ .
حنان: مترنحة بثمالة. على أحلى سنين عمرى اللى سرقها ابن الكلب.
نجوى: ما تضيعيش وقتك.الحقى عيشى حياتك يا حمارة.
حنان: شوفوا لى ألبوم الصور عشان أحرقه كله. مش عايزه حاجة تفكرنى بيه.
ثم تشعل ولاعة وتحرق الصورة.
15 نوم يوسف ليل داخلى
يوسف يسحب سونيا من يدها والصالة مظلمة.
يوسف: خشى تعالى.
سونيا: ضاحكة بثمالة. إنت مضلمها من أولها ليه؟.
يوسف: هش. وطى صوتك.
سونيا: بدهشة. إنت مش طلقت ؟
يوسف: يغلق النافذة. الجيران غلسين.
سونيا تفتح ألبوم الصور فيأخذه ويلقيه.
يوسف: أنا مش مصدق أنك هنا معايا. تشربى حاجة أصفرا يا حياتى؟
سونيا: ما إحنا شربنا لما اتعمينا. تخلع ملابسها. ألا بالحق أنت مين ياه؟
الاثنان فى الفراش. يطفئ المصباح ويهم يقبلها.
سونيا: هتصورنى وتطلعنى فى الإعلانات إمتى؟
يوسف: صبرك بالله يا ولية.
نسمع فى الظلام صوت حنان.
حنان: إنت يا سى يوسف.
يوسف: بفزع. مراتى. استخبى بسرعة.
حنان: أنت بأى حق تاخد ألبوم الصور وجواباتى؟ تبعتهم لى بكره لأنى مش عايزه أشوف خلقة أهلك ؟. صوت وضع السماعة.
يوسف: بتتمحك , سيبك منها.كنا بنقول إيه؟
سونيا: كنت بتقول هتشغلنى معاك.
يوسف: محبطا. طب أضحكى عليا شوية فى الأول ومثلى أنك بتحبينى.
سونيا: ما أنا بحبك.
يوسف: وأنا مصدقك .حضن كبير بقى.
سونيا: خد. تفتح ذراعيها تحتضنه بعنف وتقلبه تحتها.
يوسف: ما تنسيش أنا الراجل!.
إلى الأسبوع المقبل